by Giorgi 
Tron-ის დამფუძნებელი მარეგულირებელს 10 მილიონს გადაუხდის
კრიპტო პროექტ Tron-ის დამფუძნებელი ჯასტინ სანი (Justin Sun) აშშ-ის ფასიანი ქაღალდებისა და ბირჟების კომისიასთან (SEC) დავის მოსაგვარებლად 10 მილიონ დოლარს გადაიხდის. მარეგულირებელმა ბიზნესმენი კრიპტოაქტივებით TRX და BTT (BitTorrent Token) საბაზრო მანიპულაციებში, ასევე ფასიანი ქაღალდების შესახებ კანონმდებლობის დარღვევაში დაადანაშაულა.
SEC-მა სარჩელი 2023 წელს გარი გენსლერის (Gary Gensler) თავმჯდომარეობის დროს შეიტანა. საქმეში Tron-თან დაკავშირებული ორგანიზაციები: Tron Foundation, BitTorrent Foundation და Rainberry-ც ფიგურირებენ. მარეგულირებლის განცხადებით, ეს სუბიექტები არარეგისტრირებული ფასიანი ქაღალდების გაყიდვით იყვნენ დაკავებული.
SEC-ის ცნობით, სანი TRX-ის აქციებით ფიქტიურ ვაჭრობაში მონაწილეობდა. ასევე სააგენტოს მტკიცებით, მან BTT-ის პოპულარიზაციისთვის ცნობილ ადამიანებს, მათ შორის რეპერ Akon-ს, მსახიობ ლინდსი ლოჰანს და მოკრივე ჯეიკ პოლს თანხა გადაუხადა .
მარეგულირებელმა სამწლიანი განხილვა დაასრულა. SEC-მა განმარტა, რომ სანმა და მასთან დაკავშირებულმა კომპანიებმა ბრალდებები არც აღიარეს და არც უარყვეს, თუმცა ჯარიმის გადახდის შემთხვევაში, მათ წინააღმდეგ პრეტენზიები გაბათილდება. საკითხის მოგვარების სანაცვლოდ, კომპანია Rainberry 10 მილიონი დოლარის გადახდას დათანხმდა.
„განხილვის შეწყვეტით ამ საქმეს წერტილი დაესმევა. მე შეერთებულ შტატებსა და მთელ მსოფლიოში ინოვაციების ხელშეწყობას კვლავაც გავაგრძელებ. მომავალში კრიპტოვალუტის მარეგულირებელი სახელმძღვანელო პრინციპებისა და წესების შესამუშავებლად, SEC-თან თანამშრომლობას მოუთმენლად ველი .“- დაწერა სანმა სოციალურ ქსელ X-ში.
საქმის განხილვის შეწყვეტის შესახებ SEC-ის გადაწყვეტილება ზოგიერთი დემოკრატი კანონმდებლის მხრიდან კრიტიკის მიზეზი გახდა. მათი ვარაუდით, საქმის შეწყვეტა შესაძლოა სანის აშშ-ის პრეზიდენტ დონალდ ტრამპის კრიპტო პროექტებთან ფინანსური კავშირის მიზეზით მოხდა. ბიზნესმენს წარსულში ტრამპების ოჯახთან დაკავშირებულ პლატფორმაზე World Liberty Financial ტოკენების შესაძენად 30 მილიონი დოლარი აქვს დახარჯული.
დემოკრატებმა შეთანხმების უფრო საფუძვლიანი განხილვა მოითხოვეს და SEC-ს Tron-ის დამფუძნებლის წინააღმდეგ საქმის ხელახლა გახსნისკენ მოუწოდეს.
სიახლეების გამოწერა
