by Giorgi 
Binance-ს ირანთან საიდუმლო კავშირებზე შეამოწმებენ
აშშ-ის იუსტიციის დეპარტამენტი ჩაატარებს გამოძიებას იმის დასადგენად, იყენებდა თუ არა ირანი უმსხვილეს კრიპტოვალუტის ბირჟა Binance-ს საერთაშორისო სანქციების თავიდან ასაცილებლად. გამოძიება ასევე დაადგენს, ხდებოდა თუ არა პლატფორმის დახმარებით იემენში ჰუსიტების მხარდაჭერა.
აშშ-ის ხელისუფლება ეჭვობს, რომ ირანის მიერ მხარდაჭერილი შეიარაღებული დაჯგუფებების დასაფინანსებლად 1 მილიარდ დოლარზე მეტი გადაირიცხა. ეს თანხა The Wall Street Journal-ის სტატიაში იყო ნახსენები. აშშ-ს იუსტიციის დეპარტამენტი გამოცემაში გამოქვეყნებული ინფორმაციის სიზუსტისა და ასევე Binance-ის ან მისი მომხმარებლების მხრიდან სანქციების დარღვევის შესაძლებლობის გარკვევას იმედოვნებს.
ცოტა ხნით ადრე, Binance-მა სანქციების არიდებასთან დაკავშირებული შიდა გამოძიება თავადვე დაიწყო, თუმცა მალევე შეწყვიტა. გამოცემა Fortune-ის ცნობით, ბირჟამ მოგვიანებით სამსახურიდან ის თანამშრომლები გაათავისუფლა, რომლებმაც სანქციების დარღვევების შემთხვევები გამოავლინეს. ამის შემდეგ, მასაჩუსეტსის შტატის სენატორის ელიზაბეტ უორენის (Elizabeth Warren) ხელმძღვანელობით, აშშ-ის 11 კანონმდებლისგან შემდგარმა ჯგუფმა ფედერალურ ხელისუფლებას Binance-ის მხრიდან სანქციებისა და ფულის გათეთრების საწინააღმდეგო მოთხოვნების (AML) შესრულების შემოწმებისკენ მოუწოდა.
საპასუხოდ, Binance-მა განაცხადა, რომ სენატორების გამოძიება „აშკარად ცრუ და ცილისმწამებლურ“ ინფორმაციას ეფუძნებოდა.
„ბოლოდროინდელი პუბლიკაციები, რომლებსაც თქვენი გამოძიება ეფუძნება, აშკარად ყალბია, არ არის დადასტურებული სანდო მტკიცებულებებით და არაერთ მნიშვნელოვან ასპექტში კომპანიის რეპუტაციას აზიანებს.“– განაცხადეს ბირჟის წარმომადგენლებმა სენატორებისთვის გაგზავნილ წერილში.
Binance აცხადებს, რომ ჰონგ-კონგში დაფუძნებულ კომპანიებს Hexa Whale-სა და Blessed Trust-ს, რომლებიც სენატის გამოძიებაში ფიგურირებენ, ირანთან სავარაუდო კავშირში ეჭვმიტანილ კრიპტო საფულეებთან ირიბი შემხებლობა ჰქონდათ. Binance-ის განცხადებით, კრიპტო ბირჟამ გამოძიება სამართალდამცავი ორგანოების მოთხოვნების საპასუხოდ დაიწყო და ზემოთხსენებული სერვისის პროვაიდერები პლატფორმიდან მოხსნა. კომპანიის მტკიცებით, უშუალოდ ირანულ სუბიექტებთან პირდაპირი ტრანზაქცია Binance-ის არცერთ ანგარიშს არ განუხორციელებია.
Binance-ის მხრიდან ისლამური რეჟიმის დახმარების შესახებ ინფორმაცია თებერვლის ბოლოს რამდენიმე მედიასაშუალებამ გაავრცელა. The New York Times-ის ცნობით, Binance-ის შიდა გამოძიებამ პლატფორმაზე 1500-ზე მეტი ანგარიში გამოავლინა, რომლებზეც წვდომა ირანიდან განხორციელდა. გამოცემის თანახმად, Binance-ის ორი ანგარიშიდან დაახლოებით 1.7 მილიარდი დოლარი ირანის მთავრობასთან დაკავშირებულ ორგანიზაციებში, მათ შორის ისლამური რევოლუციის გუშაგთა კორპუსის (IRGC) კუთვნილ საფულეებში გადაირიცხა. The Wall Street Journal-ის განცხადებით კი, Hexa Whale Trading-ის მეშვეობით IRGC-ში დაახლოებით 500 მილიონი აშშ დოლარი გადავიდა.
წყარო: https://www.theblock.co/post/393168/us-doj-probes-whether-iran-used-binance-to-evade-sanctions-wsj
სიახლეების გამოწერა
