by Giorgi 
ბრიტანეთის ყოფილმა პრემიერ-მინისტრმა ბიტკოინს პონცის სქემა უწოდა
დიდი ბრიტანეთის ყოფილმა პრემიერ-მინისტრმა ბორის ჯონსონმა ბიტკოინს „გიგანტური პონცის სქემა“ უწოდა და განაცხადა, რომ კრიპტოვალუტების ღირებულება მეტწილად არა მათ შინაგან ღირებულებაზე, არამედ ინვესტორების ნდობაზეა დამოკიდებული.
Daily Mail-ისთვის დაწერილ სტატიაში ჯონსონმა განაცხადა, რომ ბიტკოინის ფასი კრიპტოვალუტაში ახალი ინვესტორების შემოდინებაზეა დამოკიდებული. მან მაგალითად ნაცნობის ისტორია მოიყვანა, რომელმაც ბიტკოინში ინვესტიცია მეგობრის რჩევით ჩადო.
თავდაპირველად მან 500 ფუნტი სტერლინგის (დაახლოებით 661 აშშ დოლარი) ინვესტიცია განახორციელა თანხის გაორმაგების მოლოდინით. თუმცა, რამდენიმე წლის შემდეგ, თანხების დაბრუნების მცდელობისას სირთულეები შეექმნა და საბოლოოდ დაახლოებით 20,000 ფუნტი სტერლინგი (დაახლოებით 26,446 აშშ დოლარი) დაკარგა. ჯონსონმა არ დააკონკრეტა, იყო თუ არა ეს პირდაპირი ინვესტიცია ბიტკოინში თუ ინვესტიცია თაღლითურ კრიპტო პლატფორმაში.
ყოფილმა პრემიერ-მინისტრმა აღნიშნა, რომ ასეთი შემთხვევები იშვიათი არ არის, განსაკუთრებით ხანდაზმულ ადამიანებში. ის მიიჩნევს, რომ ფინანსური სირთულეების წინაშე მყოფი ინვესტორები მაღალი რისკებისა და არასტაბილურ აქტივებში ინვესტირებას ხშირად დანაკარგების ანაზღაურების იმედით აგრძელებენ.
ჯონსონის განცხადებით, ბიტკოინს ფუნდამენტური ღირებულება არ გააჩნია, ხოლო კრიპტოვალუტა უბრალოდ „კომპიუტერებში შენახული რიცხვების თანმიმდევრობაა“ და ძირითადად თაღლითობისა და სპეკულაციური ვაჭრობისთვის გამოიყენება. მისი აზრით, პოკემონის საკოლექციო ბარათებსაც კი მეტი ღირებულება აქვთ.
„ბიტკოინს არ ჰყავს მთავარი ბანკირი, რომლის გათავისუფლებაც შეიძლება, არც მთავრობა, რომლის შეცვლაც არჩევნების გზით არის შესაძლებელი. ყველაფერი მისი მფლობელების კოლექტიურ რწმენაზეა დამოკიდებული. თუ კრიპტოვალუტების მიმართ ნდობა გაქრება, ინდუსტრია რთულ მდგომარეობაში აღმოჩნდება.“ – წერს ჯონსონი.
ჯონსონს სოციალურ პლატფორმა X-ზე კომპანია Strategy-ის თავმჯდომარე მაიკლ სეილორი (Michael Saylor) გამოეხმაურა და განაცხადა, რომ პოლიტიკოსი ცდება. სეილორის თქმით, ბიტკოინი პონცის სქემა ვერ იქნება, რადგან მსგავსი სქემები ცენტრალურ ოპერატორს საჭიროებს, რომელიც მოგების დაპირებას იძლევა და ადრეულ ინვესტორებთან ანგარიშსწორებას ახალბედების შენატანის ხარჯზე ახდენს.
„ბიტკოინს არ ჰყავს ემიტენტი, პრომოუტერი და არც გარანტირებული მოგება – ეს მხოლოდ ღია, დეცენტრალიზებული ქსელია, რომელიც კოდითა და ბაზრის მოთხოვნით იმართება.“- განმარტა სეილორმა.
Strategy ბიტკოინის უმსხვილეს კორპორატიულ მფლობელად ითვლება. ამჟამად ის 738,731 BTC-ს ფლობს, რაც კრიპტოვალუტის მაქსიმალური მარაგის, 21 მილიონი მონეტის, დაახლოებით 3.52%-ს შეადგენს. Strategy-მ ცოტა ხნის წინ დამატებით 7,000 BTC შეიძინა, რომელთა ღირებულება დაახლოებით 500 მილიონი დოლარია, ხოლო ჯამში, ბოლო ორი კვირის განმავლობაში კომპანიამ 11,000 BTC-ზე მეტი შეიძინა.
წყარო: https://www.dailymail.co.uk/debate/article-15643681/BORIS-JOHNSON-bitcoin-ponzi-scheme.html
სიახლეების გამოწერა
