by Giorgi 
რესპუბლიკელებს სურთ ამერიკელმა მაინერებმა ჩინურ ASIC-ებზე უარი თქვან
აშშ-ს ლუიზიანას შტატის სენატორმა ბილ კასიდიმ (Bill Cassidy) და ვაიომინგის შტატის სენატორმა სინტია ლამისმა (Cynthia Lummis) წარადგინეს კანონპროექტი „Mined in America“, რომელიც მაინინგს დაარეგულირებს. რესპუბლიკელი სენატორების განცხადებით, კანონპროექტი კრიპტოვალუტის მაინინგს გაამარტივებს და ჩინურ ტექნოლოგიებზე დამოკიდებულებას შეამცირებს.
კანონპროექტის თანახმად, აშშ-ის სავაჭრო დეპარტამენტი ვალდებული იქნება „Mined in America“-ს ნებაყოფლობითი სერტიფიცირების პროგრამა შექმნას, სადაც მაინინგ კომპანიები იმის დამადასტურებელ სერტიფიკატს მიიღებენ, რომ საქმიანობას კანონმდებლობის დაცვით ახორციელებენ. სერტიფიცირებულ კომპანიებს მოხმარებიდან იმ ქვეყნებში წარმოებული აღჭურვილობის ეტაპობრივი ამოღება მოეთხოვებათ, რომლებსაც აშშ-ის ხელისუფლება არამეგობრულად მიიჩნევს. ამ სახით, როგორც მათი უცხოელ მომწოდებლებზე დამოკიდებულება, ისე უსაფრთხოების რისკებიც შემცირდება.
იმისთვის, რომ უცხოური, ძირითადად ჩინური, აღჭურვილობიდან ადგილობრივზე გადასვლა მაინერებისთვის ფინანსურად ნაკლებად მტკივნეული იყოს, სენატორები ენერგეტიკისა და სოფლის მეურნეობის განვითარების ფედერალურ პროგრამებში ჩართვის ინიციატივით გამოვიდნენ. კანონპროექტის ავტორები მიიჩნევენ, რომ სტანდარტებისა და ტექნოლოგიების ეროვნული ინსტიტუტის მხარდაჭერით, ამერიკული ბიზნესები საკუთარი ენერგოეფექტური მაინინგის აღჭურვილობის შექმნას შეძლებენ. სენატორების აზრით, ASIC მაინერების წარმოება და ბიტკოინის მაინინგი მთავრობის ზედამხედველობის ქვეშ, შეერთებულ შტატებში უნდა იყოს კონცენტრირებული.
კანონპროექტი ასევე აშშ-ის ფინანსთა სამინისტროს მიერ ბიტკოინის სტრატეგიული რეზერვის შექმნას ითვალისწინებს.
„ციფრული აქტივების მოპოვება ჩვენი ეკონომიკის მნიშვნელოვანი ნაწილია. ჩვენ მაინინგი აქ, ამერიკაში უნდა ვაწარმოოთ. ეს კანონპროექტი მიწოდების ქსელის უსაფრთხოებას უზრუნველყოფს და მხარს დაუჭერს ამერიკულ წარმოებას და მაინინგს. – განაცხადა სენატორმა კესიდიმ.
რესპუბლიკელების ინიციატივას მხარი Satoshi Action Fund-ის თანადამფუძნებელმა დენის პორტერმა (Dennis Porter) დაუჭირა. მისი თქმით, შეერთებული შტატები გლობალური ბიტკოინის ჰეშრეიტის 38%-ს აკონტროლებს, თუმცა მისი აპარატურის 97% ჩინეთიდან მოდის. ცოტა ხნის წინ, მაინინგ კომპანია American Bitcoin, რომლის თანადამფუძნებელიც აშშ-ის პრეზიდენტის შვილი ერიკ ტრამპია, ბიტკოინის მე-16 უდიდესი მფლობელი გახდა. Bitcoin Treasuries-ის მონაცემებით, კომპანია ამჟამად 7000 ბიტკოინს ფლობს.
