by Giorgi 
კრიპტოვალუტაში კაპიტალის შემოდინება სამჯერ შემცირდა
საბანკო ჰოლდინგ JPMorgan-ის ანალიტიკოსების განცხადებით, მიმდინარე წლის პირველ კვარტალში კრიპტოაქტივებში შემოსულმა თანხებმა დაახლოებით 11 მილიარდი დოლარი შეადგინა – რაც გასული წლის ანალოგიურ პერიოდთან შედარებით თითქმის სამჯერ ნაკლებია.
ანალიტიკოსების პროგნოზით, ამჟამინდელი ტემპის შენარჩუნების შემთხვევაში, წლის ბოლოსთვის კრიპტოაქტივებში შემოსული ფულადი ნაკადის მთლიანმა მოცულობამ შესაძლოა დაახლოებით 44 მილიარდ დოლარს მიაღწიოს. 2025 წელს ეს მაჩვენებელი დაახლოებით 130 მილიარდ დოლარს შეადგენდა.
პირველ კვარტალში ფულადი ნაკადის ძირითადი ნაწილი მსხვილი ინვესტორების, მათ შორის BTC-ის უმსხვილესი კორპორატიული მფლობელის Strategy-ისა და კრიპტო ვენჩურული კაპიტალის ფონდებზე მოდიოდა. ამასთან, საცალო ინვესტორების აქტივობა შემცირდა და ზოგიერთ სეგმენტში გადინება დაფიქსირდა.
ანალიტიკოსებმა მოთხოვნის მზარდი კონცენტრაცია აღნიშნეს : მსხვილი მონაწილეები აქტივების დაგროვებას აგრძელებენ, ზოგი კომპანია კი ინვესტიციებს ამცირებს ან ლოდინის მიდგომას მიმართავს.
Strategy-ს შემთხვევაში, კომპანია სისტემატური დაგროვების სტრატეგიას იყენებს -კომპანია ბიტკოინის შესყიდვებს აქციების განთავსებით აფინანსებს და ამ პრაქტიკის გაგრძელებას გეგმავს.
კაპიტალის შემოდინებაზე მნიშვნელოვანი გავლენა მაინინგ კომპანიებმა მოახდინეს. პირველ კვარტალში მათ გამყიდველის როლი შეასრულეს. JPMorgan-მა ეს დაფინანსების პირობების გამკაცრებას და ლიკვიდურობის შენარჩუნების აუცილებლობას მიაწერა. ზოგიერთ შემთხვევაში, გაყიდვები ასევე ბიზნესის დივერსიფიკაციის ხარჯებთან, მათ შორის ხელოვნური ინტელექტის პროექტებთან იყო დაკავშირებული.
ანალიტიკოსების შეფასებით, საერთო ჯამში, არსებული სიტუაცია ფულადი ნაკადების შემოდინების შენელებასა და კრიპტოაქტივების ბაზარზე მოთხოვნის სტრუქტურის ცვლილებაზე მიუთითებს.
წყარო: https://www.theblock.co/post/396327/jpmorgan-crypto-flows-drop-11-billion-q1
სიახლეების გამოწერა
