დეცენტრალიზებულმა ბირჟამ Stabble, რომელიც Solana-ს ეკოსისტემაზეა დაფუძნებული, მომხმარებლებს მოუწოდა, სასწრაფოდ გაიტანონ საკუთარი სახსრები. მიზეზად დასახელდა ერთ-ერთი დეველოპერის შესაძლო კავშირი ჩრდილოეთ კორეასთან.
გაფრთხილება გავრცელდა ბლოკჩეინის ანალიტიკოსის, ფსევდონიმით ZachXBT-ის გამოძიების შემდეგ. მისი თქმით, ერთ-ერთ დაკავშირებულ პროექტში — Elemental-ში — მუშაობდა სავარაუდო ჩრდილოეთ კორეელი დეველოპერი.
მისი ინფორმაციით, აღნიშნული პირი იყენებდა სახელს კეისუკე ვატანაბე (Keisuke Watanabe) და ასევე რამდენიმე ფსევდონიმს, მათ შორის: kasky53, keisukew53, kdevdivvy და 0xWoo.
ZachXBT-მ ასევე აღნიშნა:
„შეწყვიტეთ მოჩვენებითი მორალურობის ჩვენება — თქვენ წლების განმავლობაში მალავდით ფაქტს, რომ Elemental-ში IT სპეციალისტი ჩრდილოეთ კორეიდან მუშაობდა.“
Stabble-ის გუნდმა დაადასტურა, რომ მსგავსი თანამშრომელი ნამდვილად შეიძლება მუშაობდა წარსულში, თუმცა ამჟამად პროექტს ახალი გუნდი მართავს, რომელმაც კონტროლი დაახლოებით ოთხი კვირის წინ გადაიბარა.
შემდგომში ბირჟის წარმომადგენლებმა განმარტეს, რომ ჰაკინგის ფაქტი არ დაფიქსირებულა და თანხების გატანის რეკომენდაცია პრევენციული ხასიათის იყო. კომპანიის განცხადებით, მათი მთავარი პრიორიტეტი ლიკვიდურობის მიმწოდებლების უსაფრთხოებაა.
ასევე აღინიშნა, რომ პლატფორმის უსაფრთხოების დამატებითი შემოწმებები იგეგმება.
მანამდე MetaMask-ის უსაფრთხოების სპეციალისტმა ტეილორ მონაჰანმა (Taylor Monahan) განაცხადა, რომ ჩრდილოეთ კორეელი სპეციალისტები უკვე მინიმუმ შვიდი წელია ინფილტრაციას ახორციელებენ კრიპტო კომპანიებსა და DeFi პროექტებში, ხშირად — პლატფორმების გატეხვის მიზნით.
კრიპტო სამყაროში 2017 წლიდან. #bitcoin
