by Giorgi 
Tether-მა 344 მილიონ დოლარზე მეტი ღირებულების USDT გაყინა
სტეიბლკოინ USDT-ის ემიტენტმა კომპანიამ Tether მისი არსებობის მანძილზე ერთ-ერთი ყველაზე მასშტბური თანხების ბლოკირების შესახებ გამოაცხადა. „შავ სიაში“ მოხვედრილ ორ საფულეზე ჯამურად 344 მილიონ დოლარზე მეტის გაყინვა განხორციელდა. Tron-ის ქსელში არსებული ორი საფულიდან ერთზე – (TNiq9…QZH81) 213 მლნ USDT, ხოლო მეორეზე – (TTiDL…pjSr9 ) დაახლოებით 131 მლნ USDT ინახებოდა.
Tether-ში აცხადებენ, რომ ბლოკირების საფუძველი უკანონო საქმიანობის, მათ შორის სანქციების გვერდის ავლისა და მფლობელების კრიმინალურ ქსელებთან კავშირის შესახებ არსებული ინფორმაცია გახდა. კომპანიას არ დაუკონკრეტებია, თუ რომელ სანქციებზეა საუბარი. მათივე განცხადებით, გაყინვა აშშ-ის ფინანსთა სამინისტროს უცხოური აქტივების კონტროლის სამმართველოსა (OFAC) და ამერიკული სამართალდამცავი ორგანოების ინიციატივით მოხდა.
„USDT არ არის თავშესაფარი უკანონო საქმიანობისთვის. კომპანია დასანქცირებულ პირებთან ან დანაშაულებრივ ჯგუფებთან გამოვლენილ კავშირებზე ოპერატიულად რეაგირებს. “ – განაცხადა Tether-ის გენერალურმა დირექტორმა, პაოლო არდოინომ (Paolo Ardoino).
Tether-მა რეგულატორებთან და სამართალდამცავებთან უფრო აქტიურად თანამშრომლობა 2023 წლის ბოლოდან დაიწყო. კომპანიის მტკიცებით, იგი 65 ქვეყნის 340-ზე მეტ სამართალდამცავ უწყებასთან თანამშრომლობს და საფულეები 2300-მდე საქმესთან დაკავშირებით აქვს დაბლოკილი. ჯამში კომპანიამ 4,4 მილიარდ დოლარზე მეტი ღირებულების აქტივი გაყინა, საიდანაც 2,1 მილიარდზე მეტი აშშ-ის ხელისუფლების მოთხოვნებს უკავშირდება.
2023 წლის ნოემბერში სამხრეთ-აღმოსავლეთ აზიაში ადამიანებით ვაჭრობასა და თაღლითურ სქემებთან დაკავშირებით კომპანიამ 225 მლნ USDT გაყინა. მიმდინარე წლის იანვარში კი სამართალდამცავების მოთხოვნის საფუძველზე Tether-მა Tron-ის ხუთ საფულეზე დაახლოებით 182 მლნ დოლარი დაბლოკა.
ამასთან, სტეიბლკოინებით ტრანზაქციების მოცულობაში USDT-ის წილი თანდათან იკლებს. Visa-ს ანალიტიკური მონაცემების მიხედვით, მისი მთავარი კონკურენტის – კომპანია Circle-ის USDC-ის წილი თებერვალში 71%-მდე გაიზარდა, მაშინ როცა USDT-ის წილი 28%-მდე შემცირდა. იანვარშიც შეფარდება USDC-ის სასარგებლოდ – 54% 45%-ის წინააღმდეგ იყო.
აღსანიშნავია, რომ Tether-ის მსგავსად Circle-იც ტოკენების საფულეებს რეგულარულად ყინავს, თუმცა, ცოტა ხნის წინ, კრიტიკის ქარცეცხლში დაგვიანებული რეაგირების გამო მოექცა. ბლოკჩეინ-მკვლევარმა ZachXBT კომპანია უმოქმედობაში იმის გამო დაადანაშაულა, რომ კრიპტოპროტოკოლ Drift-ის გატეხვის შედეგად მოპარული 230 მლნ დოლარი Circle-ის პროტოკოლის მეშვეობით Solana-დან Ethereum-ზე შეუფერხებლად გადაადგილდებოდა.
სიახლეების გამოწერა
