ევროკავშირმა რუსული კრიპტო პლატფორმების წინააღმდეგ ახალი სანქციები შეიმუშავა

ევროკავშირმა რუსული კრიპტო პლატფორმების წინააღმდეგ ახალი სანქციები შეიმუშავა

სანქციების მე-20 პაკეტის ფარგლებში ევროკავშირმა შეზღუდვები დააწესა რუსეთში რეგისტრირებული იმ პროვაიდერებისა და პლატფორმების მიმართ, რომლებიც კრიპტოაქტივების გადაცემასა და გაცვლას უზრუნველყოფენ. აკრძალვა ძალაში 24 მაისიდან შევა.

ევროკავშირის ოფიციალურ ჟურნალში გამოქვეყნებული დოკუმენტის თანახმად, ევროპულ კომპანიებსა და მოქალაქეებს იმ რუსული პროვაიდერებისა და პლატფორმების მომსახურებით სარგებლობა ეკრძალებათ, რომლებიც კრიპტოვალუტის გადარიცხვასა და გაცვლას ახორციელებენ. შეზღუდვები როგორც ცენტრალიზებულ, ისე დეცენტრალიზებულ სერვისებზე ვრცელდება.

ცალკეული პუნქტით იკრძალება ოპერაციები რუსული რუბლის კურსზე მიბმული და ციფრული ფინანსური აქტივებით უზრუნველყოფილი RUBx-ით. აღნიშნული პროექტი სახელმწიფო კორპორაცია „როსტექის“ მონაწილეობით განხორციელდა, მისი მიმოქცევა კი პლატფორმა RT Pay-ს მეშვეობით ხდება.

ევროკავშირმა ციფრული რუბლის შემუშავებისა და დანერგვის პროცესში ნებისმიერი სახის მხარდაჭერა შეზღუდა. პაკეტში ასევე შევიდა ოპერაციების აკრძალვა მესამე ქვეყნების იმ სტრუქტურებთან, რომლებიც კრიპტო ან საგადახდო სერვისების მეშვეობით სანქციებისთვის გვერდის ავლის სერვისებს სთავაზობენ.

შეზღუდვების სიაში მოხვდა ყირგიზული კრიპტოკომპანია TengriCoin. ევროკავშირში განმარტავენ, რომ ის პლატფორმა Meer-ის ოპერატორს წარმოადგენს და მისი მეშვეობით სტეიბლკოინ A7A5-ის მნიშვნელოვანი მოცულობები გადაადგილდება.

დოკუმენტში აღნიშნულია, რომ A7A5 უზრუნველყოფილია „პრომსვიაზბანკში“  განთავსებული სახსრებით, რაც ევროკავშირის შეფასებით,რუსეთის ფინანსური სექტორის მხარდაჭერას უწყობს ხელს. ასევე, დოკუმენტში საუბარია TengriCoin-ის კავშირებზე კომპანიებთან A7 და Old Vector LLC, რომლებიც A7A5-ის გამოშვების სტრუქტურაში მონაწილეობენ.

ევროპულ საბჭოში განმარტავენ, რომ სანქციების გამკაცრება არსებული ფინანსური შეზღუდვების ფონზე,  რუსეთის მიერ საერთაშორისო ანგარიშსწორებისთვის კრიპტოვალუტების მზარდი გამოყენებით არის გამოწვეული.