TrustedVolumes ჰაკერული შეტევის მსხვერპლი გახდა — კომპანიამ თითქმის $6 მილიონი დაკარგა

TrustedVolumes, რომელიც დეცენტრალიზებული ბირჟების აგრეგატორ 1inch-ისთვის ლიკვიდობას უზრუნველყოფს, მასშტაბური ჰაკერული თავდასხმის მსხვერპლი გახდა. თავდამსხმელებმა პლატფორმიდან თითქმის $6 მილიონი დოლარის ღირებულების კრიპტოაქტივები გაიტანეს.

მოპარული აქტივებიდან ყველაზე დიდი ნაწილი მოდიოდა:

• 1291 Wrapped Ethereum (WETH) — დაახლოებით $3.02 მილიონი;
• 16.94 Wrapped Bitcoin (WBTC) — დაახლოებით $1.37 მილიონი;
• USD Coin (USDC) — დაახლოებით $1.26 მილიონი;
• Tether (USDT) — დაახლოებით $206 000.

რა გახდა ჰაკის მიზეზი

კიბერუსაფრთხოების კომპანია Blockaid-ის ექსპერტების განცხადებით, თავდასხმა შესაძლებელი გახდა სმარტ-კონტრაქტში არსებული ციფრული ხელმოწერების გადამოწმების მექანიზმის მოწყვლადობის გამო.

ჰაკერმა გამოიყენა კონტრაქტის საჯარო ფუნქცია და საკუთარი მისამართი სავაჭრო ორდერების ავტორიზებულ ხელმომწერად დაარეგისტრირა. ამის შემდეგ მას შესაძლებლობა მიეცა გაეყალბებინა ორდერები და მომხმარებლების აქტივები უკვე გაცემული ნებართვების გამოყენებით გაეტანა.

მოპარული თანხები Ethereum-ში გადაიტანეს

TrustedVolumes-ის გატეხვის შემდეგ, მოპარული თანხების დიდი ნაწილი Ethereum-ში გადაიყვანეს. მოგვიანებით აქტივები რამდენიმე სხვადასხვა კრიპტოსაფულეზე გადანაწილდა, რათა თანხების წარმოშობის დაფარვა და მათი მოძრაობის კვალის დადგენა გართულებულიყო.

პროექტის გუნდმა ჰაკის ფაქტი ოფიციალურად დაადასტურა და განაცხადა, რომ ინციდენტის გამოძიება უკვე დაწყებულია.

შესაძლოა იგივე ჰაკერი იდგეს 1inch-ის ძველი თავდასხმის უკან

Blockaid-ის წარმომადგენლების ვარაუდით, თავდასხმაში შესაძლოა მონაწილეობდეს იგივე ჰაკერი, რომელიც 2025 წლის მარტში 1inch Fusion-ის გატეხვაშიც ფიგურირებდა.

ცოტა ხნის წინ, კიბერუსაფრთხოების კომპანია PeckShield-მაც გაავრცელა ინფორმაცია, რომ კრიპტოპროექტ Aethir-ის სისტემიდან 400 000-ზე მეტი USDT მოიპარეს. შეტევა განხორციელდა AethirOFTAdapter-ის მეშვეობით, რომელიც სხვადასხვა ბლოკჩეინს შორის ტოკენების გადასატანად გამოიყენება.