სამი მსხვილი ბლოკჩეინ პროექტი ერთდროულად დაიხურა

სამი მსხვილი ბლოკჩეინ პროექტი ერთდროულად დაიხურა

21 მაისს რამდენიმე საათის ინტერვალით ბლოკჩეინ-ინფრასტრუქტურის შექმნაზე მომუშავე სამმა პროექტმა: Syndicate Labs, Everclear (ყოფილი Connext) და ZERO Network  მუშაობა ერთდროულად შეწყვიტა. 2021 და 2022 წლებში ყველა ამ პროექტმა მსხვილი ვენჩურული კაპიტალი მოიზიდა.

Syndicate Labs ეთერიუმის ეპჩეინების (appchains) –  სპეციალიზებული ბლოკჩეინების ინფრასტრუქტურის შემუშავებით იყო დაკავებული. პროექტი ასევე ტრანზაქციების თანმიმდევრულ დამუშავებაზე სპეციალიზდებოდა. 2021 წელს კომპანიამ ვენჩურული კომპანია Andreessen Horowitz-ის მონაწილეობით, 20 მილიონი დოლარი მოიზიდა. Syndicate Labs-მა როლაპებზე (rollups) ორიენტირებული ინსტრუმენტების შექმნაზე ხუთი წელი დახარჯა.

Syndicate Labs-ის თანადამფუძნებლის, უილ პაპერის (Will Papper) განცხადებით,  მის გუნდს „rollup-as-a-service“  საკონსულტაციო მომსახურებაზე  გადასვლა ჰქონდა გადაწყვეტილი, თუმცა აღმოაჩინა, რომ ბაზარი ამ კუთხით იცვლებოდა და კონკრეტული აპლიკაციებისთვის სპეციალურად შექმნილ, მორგებულ გარემოზე გადადიოდა.

პაპერის თქმით, ეთერიუმის ვირტუალური მანქანის (EVM) ბაზაზე შექმნილ როლაპებზე მოთხოვნა შემცირდა, რადგან დეველოპერები საერთო ინფრასტრუქტურის გამოყენების ნაცვლად, საკუთარი ჩეინების შექმნას ამჯობინებენ.

Syndicate-ში აცხადებენ, რომ ქსელი Syndicate Network Collective  Syndicate Labs-ისგან დამოუკიდებელი რჩება. დეველოპერებმა ხაზგასმით აღნიშნეს, რომ პროექტის დახურვა არ უკავშირდება აპრილში ხიდის (bridge) გატეხვას, საიდანაც ბოროტმოქმედებმა 18,5 მილიონი დოლარის ტოკენები SYND და 50 000$-ის ღირებულების მომხმარებელთა აქტივები მოიპარეს.  დაზარალებულ მომხმარებლებს დანაკარგი სრულად აუნაზღაურდათ.

საქმიანობის შეწყვეტის შესახებ ანგარიშსწორების კროსჩეინ-პროტოკოლმა Everclear-მაც გამოაცხადა.

პროტოკოლი 2017 წელს არჯუნ ბჰუპტანიმ (Arjun Bhuptani) შექმნა და მას ფონდი Ethereum Foundation აფინანსებდა. Everclear-მა 23 ქსელში 1,5 მილიარდ დოლარზე მეტი დაამუშავა და ყოველთვიურად 500 მილიონ დოლარზე მეტი ღირებულების ტრანზაქციებს ატარებდა. თუმცა, Everclear-ის ხელმძღვანელობის განცხადებით, ამას პროექტისთვის სტაბილური შემოსავალი არ მოუტანია. პროექტის ლიკვიდაციის შესახებ გამოცხადებიდან სულ რამდენიმე საათში ტოკენი CLEAR  48%-ით დაეცა და $0,0002332 შეადგინა. პროტოკოლი უკვე დახურულია და მასში ბლოკირებული სახსრები აღარ დარჩა.

მუშაობის შეწყვეტის შესახებ გამოაცხადა  ZERO Network-ის გუნდმაც, რომელიც ეთერიუმის მეორე დონის გადაწყვეტილებას წარმოადგენს და კომპანია Zerion-ის მიერ ZK Stack ტექნოლოგიის გამოყენებით არის შექმნილი. მომხმარებლებს თანხების გამოსატანად დრო 31 ივლისამდე მიეცათ.

Zerion-ის განცხადებით, რომელმაც 22,5 მილიონი დოლარის ინვესტიციის მოზიდვა შეძლო, ფოკუსირებას საფულეებისა და API პროექტების მიმართულებით გადაიტანს. ქსელმა  ბლოკების წარმოება იანვარში სამი კვირით შეაჩერა და შემდეგ ხელახლა ჩაეშვა, თუმცა, როგორც აღმოჩნდა, ხანმოკლე ვადით.

ცოტა ხნის წინ, ეთერიუმის თანადამფუძნებელმა ვიტალიკ ბუტერინმა უაზრო უწოდა მეორე დონის (L2) იმ გადაწყვეტილებებს, რომლებიც ეთერიუმის ბლოკჩეინის კლონირებას ახდენენ. პროგრამისტის აზრით, ისინი ეთერიუმს უფრო ცენტრალიზებულს ხდიან. ბუტერინი დარწმუნებულია, რომ ჭეშმარიტად ფასეული L2 გადაწყვეტილებები  ისეთ კომპონენტებს უნდა მოიცავდეს, რომლებიც ეთერიუმის ძირითად ქსელში არ არსებობს.