by shaksen 
ადამ ბექი: ალტკოინები და მემკოინები შესაძლოა ნულამდე გაუფასურდეს
კომპანია Blockstream-ის გენერალურმა დირექტორმა და ბრიტანელმა კრიპტოგრაფმა Adam Back განაცხადა, რომ ალტკოინები და მემკოინები ნებისმიერ დროს შეიძლება ნულამდე გაუფასურდეს, რაც ბაზრის ცვალებად პირობებთან არის დაკავშირებული.
ბექის თქმით, ის ჯერ კიდევ დაახლოებით ათი წლის წინ პროგნოზირებდა, რომ ბევრი მსხვილი ალტკოინი საბოლოოდ ჩამოიშლებოდა. მისი განმარტებით, ბაზარს უბრალოდ მეტი დრო დასჭირდა იმისთვის, რომ „ცარიელი ტოკენებისგან“ გაწმენდილიყო სივრცე — იმ პროექტებისგან, რომლებსაც გრძელვადიან პერსპექტივაში მდგრადობა არ გააჩნიათ.
ბიტკოინის მაქსიმალისტის შეფასებით, განსაკუთრებულად მოწყვლადები სწორედ მემკოინები არიან, რადგან მათი ზრდა ძირითადად აჟიოტაჟზე, ვირუსულ ტრენდებსა და სპეკულაციებზეა დამოკიდებული და არა რეალურ გამოყენებაზე ან ტექნოლოგიურ ღირებულებაზე.
ბექმა სოციალურ ქსელ X-ზე საკუთარ გამომწერებს ურჩია, პერიოდულად შეიძინონ ბიტკოინი და რაც შეიძლება დიდხანს შეინახონ.
მისი თქმით, მიუხედავად იმისა, რომ ალტკოინებსა და მემ ტოკენებს ბაზრის ოპტიმიზმის პერიოდში სწრაფი ზრდა შეუძლიათ, ისინი განსაკუთრებით მგრძნობიარენი არიან მკვეთრი კორექციების მიმართ — განსაკუთრებით მაშინ, როდესაც ტრეიდერების განწყობა უარესდება ან ბაზარზე ლიკვიდობა მცირდება.
ამ დროისთვის ბიტკოინის დომინირების მაჩვენებელი კრიპტოვალუტების ბაზარზე 60.1%-ს შეადგენს. ჩვეულებრივ, ბიტკოინის მაღალი დომინირების პერიოდში ალტკოინები დამატებით ზეწოლას განიცდიან, რადგან ინვესტორები უფრო ფრთხილად არჩევენ აქტივებს და კაპიტალი შედარებით სტაბილურ აქტივებში გადააქვთ.
მიუხედავად კრიტიკისა, მემკოინების ბაზარი კვლავ მილიარდობით დოლარის კაპიტალიზაციას ინარჩუნებს. მაგალითად, Dogecoin-ის საბაზრო კაპიტალიზაცია $17.4 მილიარდს შეადგენს, Shiba Inu — $3.3 მილიარდს, ხოლო Pepe — $1.4 მილიარდს.
ადამ ბექმა ასევე აღნიშნა, რომ ბოლო პერიოდში ტრეიდერები უფრო აქტიურად ყიდულობენ იმ საჯარო კომპანიების აქციებს, რომლებიც ბიტკოინს აგროვებენ, და ეს კიდევ ერთ მიზეზად დაასახელა ალტკოინებიდან ბიტკოინზე გადასასვლელად.
ცოტა ხნის წინ Blockstream-ის ხელმძღვანელმა დეცენტრალიზებული ფინანსების (DeFi) პლატფორმებიც გააკრიტიკა. მისი განცხადებით, მსგავსი პროექტები ხშირად ჰაკერული თავდასხმების სამიზნე ხდებიან სმარტ-კონტრაქტებში არსებული მოწყვლადობების გამო.
