by Giorgi 
ამერიკელ მაღალჩინოსნებს ტრამპის კრიპტობიზნესის ლობირებაში ადანაშაულებენ
The New York Times-ის ცნობით, სასაქონლო ფიუჩერსების სავაჭრო კომისია (CFTC) აშშ-ის პრეზიდენტ დონალდ ტრამპის ოჯახთან ირიბად დაკავშირებული სამი კრიპტოკომპანიის ინტერესებს ლობირებდა, და ამავდროულად ათავისუფლებდა იმ თანამშრომლებს, რომლებიც ამას ეწინააღმდეგებოდნენ.
საუბარია სამ კომპანიაზე: ბლოკჩეინ-პლატფორმა Polymarket-ზე, ბირჟა Crypto.com-ზე (რომელიც მედიაჰოლდინგ Trump Media & Technology Group-ის ბიზნესპარტნიორია) და Gemini Titan-ზე (კრიპტობირჟა Gemini-სთან აფილირებული სტრუქტურა).
CFTC-ის ცალკეული თანამშრომლების მტკიცებით, სამივე კომპანიამ აშშ-ში მუშაობის ნებართვა მიიღო, მიუხედავად იმისა, რომ „ჩვეულებრივ პირობებში“ ისინი ამ ლიცენზიებს ვერ მიიღებდნენ. ჟურნალისტებთან საუბრისას წყაროებმა განმარტეს, რომ Crypto.com დაუსაბუთებლად მიაკუთვნეს მცირე კომპანიების კატეგორიას, Polymarket-ს არ გააჩნია თაღლითობისგან დაცვის საკმარისი მექანიზმები, ხოლო Gemini Titan-ს მუშაობის დაწყებამდე აუცილებელი შემოწმება საერთოდ არ გაუვლია. NYT-ის წყაროების თქმით, ნებართვების გაცემის პროცედურებში სხვა დარღვევებიც დაფიქსირდა.
გამოცემის ინფორმაციით, ნებართვების გაცემა კატეგორიულად მოითხოვეს CFTC-ის თავმჯდომარის მოვალეობის შემსრულებელმა კეროლაინ ფემმა (Caroline Pham) და მისმა უფროსმა მრჩეველმა ბრიჯიტ ვეილსმა (Brigitte Weyls). კომისიის ორივე წევრი, რომელთაც ლიცენზიების გაცემის მართლზომიერებაში ჭვი შეიტენეს, სამუშაოს ჩამოაშორეს, ოფისში შესვლა აუკრძალეს და შიდა გამოძიების ობიექტებად აქციეს. როგორც ირკვევა, იგივე ბედი ეწია კრიპტოვალუტის საკითხებზე მომუშავე კიდევ სამ თანამშრომელს.
მოგვიანებით, კეროლაინ ფემმა CFTC-ის ხელმძღვანელის პოსტი დატოვა და მუშაობა კრიპტოკომპანია MoonPay-ში დაიწყო, რომელიც Polymarket-ის პარტნიორ ფირმას წარმოადგენს. ბრიჯიტ ვეილსი კი მარტში Gemini Titan-ის მთავარ იურიდიულ მრჩევლად დაინიშნა.
NYT აღნიშნავს, რომ ტრამპის პრეზიდენტობის განმავლობაში CFTC-მ ციფრულ აქტივებთან დაკავშირებით სულ ორი საქმე აღძრა და ორივე კერძო პირების წინააღმდეგ. შედარებისთვის, წინა პრეზიდენტის, ჯო ბაიდენის დროს, 80-ზე მეტი ასეთი საქმე აღიძრა, ხოლო ტრამპის პირველი ვადისას – 20-ზე მეტი.
რაც შეეხება პროგნოზების ბაზრებს, CFTC-მ მხოლოდ ერთი საქმე აღძრა – აშშ-ის სამხედრო მოსამსახურის წინააღმდეგ, რომელსაც ბრალი Polymarket-ზე ფსონების დასადებად საიდუმლო ინფორმაციის გამოყენებაში ედება.
კომისიის თანამშრომლების თქმით, CFTC-მ შეაჩერა სულ მცირე ხუთი სხვა გამოძიება, მათ შორის ერთ-ერთი მსხვილი ბირჟის შემოწმების დასკვნითი ეტაპი. ამასთანავე, მთავარი იურიდიული მრჩეველი, დირექტორის მოადგილე და მთავარი სასამართლო ადვოკატი, რომლებიც კრიპტოკომპანიების შემოწმებით იყვნენ დაკავებულნი, თავად გახდნენ შიდა გამოძიების ფიგურანტები.
ამ ფონზე, აშშ-ის სენატში კრიპტობაზრის შესახებ კანონპროექტის – CLARITY-ის განხილვა დაიწყო. თუ დოკუმენტი კანონად იქცევა, CFTC-ის უფლებამოსილებები ციფრული პროდუქტების სპოტ ბაზრების მიმართს მნიშვნელოვნად გაფართოვდება. კანონპროექტმა საბანკო კომიტეტი უკვე გაიარა.
სიახლეების გამოწერა
