პაკისტანმა კრიპტოვალუტის ტრანზაქციების გამო ანგარიშები გაყინა

პაკისტანმა კრიპტოვალუტის ტრანზაქციების გამო ანგარიშები გაყინა

პაკისტანის ფედერალურმა საგამოძიებო სააგენტომ იმ 1064 ადამიანის საბანკო ანგარიშები გაყინა, რომლებიც მათ კრიპტოვალუტის ტრანზაქციებისთვის იყენებდნენ.

ადგილობრივი მედიის ცნობით, პაკისტანის ფედერალური საგამოძიებო სააგენტოს (FIA) ქმედება  ისლამაბადში მდებარე კიბერდანაშაულის მოხსენების ცენტრის (CCRC) მოთხოვნას ეფუძნება. მასში ნათქვამია, რომ ათასზე მეტმა ინდივიდუალურმა მომხმარებელმა 51 მილიონი პაკისტანური რუპიის ღირებულების კრიპტოვალუტის ტრანზაქცია სხვადასხვა ბირჟის მეშვეობით განახორციელა. მათ შორის არიან Binance, Coinbase და Coinmama. ხელისუფლებამ ამ პირების საბანკო ანგარიშები გაყინა და ასევე დაბლოკა მათი საკრედიტო ბარათები, რომლებიც  ციფრული ვალუტების შესაძენად და გასაყიდად გამოიყენებოდა.

პაკისტანის ცენტრალურმა ბანკმა  კომერციულ ბანკებსა და სხვა ფინანსურ ინსტიტუტებს კრიპტოვალუტით ტრანზაქციების განხორციელება 2018 წელს აუკრძალა. თუმცა, მარეგულირებლის აკრძალვის მიუხედავად, მოსახლეობის მხრიდან კრიპტოვალუტებზე კვლავ დიდი მოთხოვნაა.

გასულ კვირას პაკისტანის სავაჭრო-სამრეწველო პალატების ფედერაციამ (FPCCI) განაცხადა, რომ ქვეყნის მოქალაქეები 20 მილიარდი დოლარის ღირებულების კრიპტოვალუტას ფლობენ. FPCCI-ს პრეზიდენტის, ნასირ ჰაიატ მაგუნის (Nasir Hayat Magoon) თქმით, ბოლო 12 თვის მანძილზე ქვეყანაში კრიპტოვალუტის ბაზარი 711%-ით გაიზარდა. 

ამიტომ, მაგუნმა  მთავრობას კრიპტოაქტივებთან მიმართებაში პოლიტიკის შერბილებისა და მათზე მარეგულირებელი ჩარჩოს ადაპტირებისკენ მოუწოდა.

სასამართლომ კრიპტოვალუტით გადახდების რეგულირების წესების შექმნის აუცილებლობა დაადგინა,

რაზეც FIA-ს და პაკისტანის ცენტრალურ ბანკს ერთად უნდა ემუშავათ. გასულ წელს პაკისტანის ფასიანი ქაღალდებისა და ბირჟის კომისიამ (SECP) საკონსულტაციო დოკუმენტი წარმოადგინა, რომელიც კრიპტოვალუტის რეგულირების კონცეფციას ასახავს.

წყარო: https://bits.media/