ესტონეთი კრიპტოვალუტას არ აკრძალავს

ესტონეთი კრიპტოვალუტას არ აკრძალავს

ესტონეთის ფინანსთა სამინისტროს განცხადებით, ახალი კანონპროექტი, რომელიც  ვირტუალური აქტივების სერვისის პროვაიდერებს არეგულირებს, მომხმარებელს კრიპტოვალუტების
ფლობას ან ყიდვა-გაყიდვას არ აუკრძალავს.

როგორც ესტონეთის ფინანსთა სამინისტროს ოფიციალური ვებგვერდი იუწყება, 2021 წლის 23 დეკემბერს, ქვეყნის მთავრობამ ფინანსური დანაშაულის რისკების შესამცირებლად  ვირტუალური
აქტივების სერვისის პროვაიდერების (VASP) რეგულირების კანონპროექტი დაამტკიცა.

ამასთან, კანონპროექტში შემოთავაზებული მოთხოვნები მომხმარებლებზე არ ვრცელდება, პასუხისმგებელი მხოლოდ VASP-ია.

კანონპროექტი  VASP-ის მომხმარებლებს კრიპტოვალუტების ფლობას ან მათით ვაჭრობას არ უკრძალავს. ასევე არ ითხოვს საფულის  გასაღებების გადაცემას.

რეგულაცია არ ვრცელდება იმ პირებზე, რომლებიც  კერძო საფულეებს იყენებენ.  ესტონური VASP-ის მეშვეობით გახსნილი ანგარიშები ანონიმური ვერ იქნება.

ვირტუალური აქტივების სერვისის პროვაიდერებს მომხმარებლების იდენტიფიცირება მოეთხოვებათ. ამასთან საიდენტიფიკაციო ინფორმაცია ისეთი სახით უნდა იყოს შენახული, რომ საბანკო გადარიცხვების მსგავსად მისი ტრანზაქციასთან დაკავშირება შეიძლებოდეს.

კანონპროექტის ავტორების თქმით, მონაცემთა შეგროვება და გაცვლა ვირტუალური აქტივების  ფინანსური დანაშაულისთვის გამოყენების რისკს მნიშვნელოვნად ამცირებს.

კანონპროექტში ნათქვამია, რომ ვირტუალური აქტივების სერვისის პროვაიდერად მუშაობისთვის ლიცენზიის მისაღებად მიმართვა მხოლოდ იმ კომპანიებს შეუძლიათ,  რომლებიც ესტონეთში ოპერირებენ. ამავდროულად, VASP-ს 125,000-დან 350,000 ევრომდე მინიმალური საწესდებო კაპიტალი უნდა ჰქონდეს, რაც  შემოთავაზებული სერვისების ტიპზეა დამოკიდებული.

ლიცენზირებული VASP-ების საშუალო წლიური ბრუნვა იგივე რჩება – 80 მილიონი ევრო.

ახლა კანონპროექტი დასამტკიცებლად ესტონეთის პარლამენტს წარედგინა. შესწორებული დოკუმენტი 2020 წლის ზაფხულში მიღებული ანონიმური კრიპტოვალუტის საფულეების აკრძალვის განვითარებას წარმოადგენს. 

მაშინ სამართალდამცავი ორგანოები და მარეგულირებლები კრიპტოვალუტის კომპანიებით ამ სფეროში გახშირებული დანაშაულებების გამო დაინტერესდნენ.

2020 წელს ესტონეთმა გამკაცრებული ზედამხედველობისა და ფულის გათეთრების წინააღმდეგ ბრძოლის ფონზე ლიცენზია 1000-ზე მეტ კრიპტოვალუტის ფირმას გაუუქმა.  2021 წლის ოქტომბერში ესტონეთის ფინანსური დაზვერვის განყოფილების ხელმძღვანელმა მატის მეკერმა (Matis Mäeker)  სახელმწიფოს კრიპტოვალუტის კომპანიებისთვის არსებული ლიცენზიების გაუქმებისა და მათი ხელახლა, უფრო მკაცრი მოთხოვნებით გაცემისკენ მოუწოდა.

წყარო: https://bits.media/