აშშ-ის ფინანსთა მინისტრმა ირანისთვის ჩამორთმეული კრიპტოვალუტის მოცულობა დაასახელა
by Giorgi 
აშშ-ის ფინანსთა მინისტრმა ირანისთვის ჩამორთმეული კრიპტოვალუტის მოცულობა დაასახელა
ამერიკის ფინანსთა სამინისტროს ხელმძღვანელის, სკოტ ბესენტის (Scott Bessent) განცხადებით, აშშ-მა ირანთან დაკავშირებული დაახლოებით 1 მილიარდი დოლარის ღირებულების კრიპტოაქტივების კონფისკაცია მოახდინა.
ამერიკულმა უწყებებმა ისლამური რესპუბლიკის ხელისუფლებასთან დაკავშირებულ კრიპტოვალუტის საფულეებზე პირდაპირი კონტროლის დამყარება შეძლეს – ამის შესახებ ბესენტმა რონალდ რეიგანის სახელობის ეროვნულ ეკონომიკურ ფორუმზე გამოსვლისას აღნიშნა.
„უბრალოდ ავიღეთ და ხელში ჩავიგდეთ მათი საფულეები. ზოგიერთ მათგანს, შესაძლოა, სწორედ ახლა შეჰყავს საკუთარი კრიპტოსაფულის ანგარიშზე შესასვლელი მონაცემები და აცნობიერებს, რომ იქ აღარაფერი დარჩა.“- დაიტრაბახა მაღალჩინოსანმა.
ბესენტმა დეტალურად ისაუბრა ირანზე შეერთებული შტატების ეკონომიკური ზეწოლის კამპანიის შესახებ, რომელიც „ოპერაცია ეკონომიკური მრისხანების“ სახელწოდებით არის ცნობილი. მისი თქმით, ოპერაციის მთავარი მიზანი რეჟიმის „კრიზისში“ შეყვანა და სანქციების გვერდის ავლის იმ მექანიზმებთან ბრძოლაა, რომლებსაც ამერიკის ხელისუფლების მონაცემებით „ისლამური რევოლუციის გუშაგთა კორპუსი“ სამხედრო საქმიანობისა და ნავთობის ექსპორტის დასაფინანსებლად იყენებს.
ამერიკელმა მინისტრმა დამსწრე საზოგადოება დაარწმუნა, რომ ჩამორთმეული ციფრული აქტივები „ირანელი ხალხის ინტერესებიდან გამომდინარე“ ინახება, ხოლო თანხის ნაწილი მომავალში, შესაძლოა, „ტერორიზმის მსხვერპლთა“ კომპენსაციებს მოხმარდეს. ბესენტის განცხადებით, ვაშინგტონი ევროპელ მოკავშირეებთან ერთად, პარალელურად ირანული ელიტის წარმომადგენელთა კუთვნილი უცხოური უძრავი ქონებისა და სხვა აქტივების დაყადაღების საკითხებზე მუშაობს.
ბესენტის მიერ გაჟღერებული თანხა რამდენიმე ოპერაციის შედეგს ასახავს და არა საფულეებზე განხორციელებულ ერთჯერად თავდასხმას. აპრილის ბოლოს აშშ-ის ხელისუფლებამ ირანთან დაკავშირებული დაახლოებით 500 მილიონი დოლარის კრიპტოაქტივების ბლოკირების შესახებ განაცხადა. მაშინ შეზღუდვების ქვეშ Tron-ის ქსელში არსებული დაახლოებით 344 მილიონი USDT მოჰყვა. თანხების ბლოკირება სტეიბლკოინის ემიტენტის, კომპანია Tether-ის მონაწილეობით განხორციელდა.
მანამდე გაზეთმა The Wall Street Journal (WSJ) გავრცელა ინფორმაცია, რომ ირანელი ფინანსისტი ბაბაკ ზანჯანი (Babak Zanjani) ირანის ხელისუფლების დასაფინანსებლად უმსხვილეს კრიპტოვალუტის ბირჟა Binance-ს იყენებდა.
სიახლეების გამოწერა
