აშშ-ის უმსხვილესი ბანკები ტოკენიზებული დეპოზიტების პლატფორმას ქმნიან

აშშ-ის უმსხვილესი ბანკები ტოკენიზებული დეპოზიტების პლატფორმას ქმნიან

გამოცემა The Wall Street Journal-ის ცნობით, აშშ-ის უმსხვილესი კომერციული ბანკები – JPMorgan Chase, Citigroup, Bank of America და Wells Fargo – ტოკენიზებული დეპოზიტებისთვის საერთო ქსელს ქმნიან. პლატფორმის ამოქმედება 2027 წლის პირველ ნახევარშია დაგეგმილი.

გაზეთის წყაროების იფორმაციით, სისტემის ოპერატორი მყისიერი გადახდების სერვისი The Clearing House იქნება. ჩამოთვლილი ბანკები სერვისის თანამფლობელებს წარმოადგენენ. ქსელისთვის ბლოკჩეინ-გადაწყვეტილებების მომწოდებელი ჯერჯერობით არ შეურჩევიათ.

მოსალოდნელია, რომ The Clearing House ფინანსური ინსტიტუტების კრიპტოვალუტის ინფრასტრუქტურას ერთიან ქსელში გააერთიანებს, რომელიც ბანკებს შესაძლებლობას მისცემს ტოკენიზებული დეპოზიტები ტრადიციულ ბანკებს შორის გზავნილებისა და გადახდების მსგავსად  გადააადგილონ. WSJ-ის ცნობით, ახალი პლატფორმის მთავარი ამოცანაა ხელი შეუშალოს ტრადიციული საბანკო სისტემიდან ლიკვიდობის გადინებას, რაც სტეიბლკოინების მზარდი პოპულარობით არის გამოწვეული.

ტოკენიზებული დეპოზიტი – ეს არის ჩვეულებრივი საბანკო ანაბარი, რომელიც ბლოკჩეინშია ჩაწერილი. დეპოზიტის მფლობელი სახსრებს ბანკში ინახავს, ხოლო ბლოკჩეინი ანგარიშსწორებისა და გადარიცხვების მექანიზმად და არა ცალკეულ ფინანსურ პროდუქტად გვევლინება.

ზოგიერთი ბანკი ტოკენიზებულ დეპოზიტების დანერგვას უკვე ახორციელებს. მაგალითად, JPMorgan კორპორატიულ მომხმარებლებთან ანგარიშსწორებისთვის შიდა პლატფორმა JPM Coin-ს იყენებს. ცოტა ხნის წინ, ბანკმა პლატფორმას ბლოკჩეინი Base დაამატა. კიდევ ერთი ბანკი Citi ტრანსსასაზღვრო გადახდებისა და სავაჭრო დაფინანსებისთვის გადაწყვეტილებების ტესტირებას სერვის Citi Token Services- ის მეშვეობით ახდენს.

ამერიკული ბანკების ეს ინიციატივა კანონპროექტ CLARITY-ის განხილვის ფონზე გაჩნდა.  დოკუმენტი, სხვა საკითხებთან ერთად, სტეიბლკოინებიდან შემოსავლის/სარგებლის მიღებას არეგულირებს. ამჟამინდელი სახით, კანონპროექტი სტეიბლკოინებზე პროცენტის დარიცხვას ერთი პირობით უშვებს : კრიპტოვალუტის პლატფორმებმა  მომხმარებელს ისეთი პროდუქტები არ უნდა შესთავაზონ, რომლებიც საბანკო ანაბრებისა და დეპოზიტების ანალოგიურია. შემოთავაზებულია, რომ ტოკენების ფლობისგან მიღებულ პროცენტებს ლოიალობის ბონუსების სახე მიეცეს.

ამავდროულად, მსოფლიოს უმსხვილესი საგადახდო სისტემები – Visa, Mastercard და Stripe  უკვე სწავლობენ სტეიბლკოინების ერთიანი პლატფორმის შექმნის შესაძლებლობას. პროექტის პარტნიორი, შესაძლოა, უმსხვილესი ამერიკული კრიპტობირჟა Coinbase გახდეს.