by Giorgi 
MoneyGram Solana-ს ვალიდატორი გახდა
ფულადი გზავნილების ერთ-ერთი უდიდესი ოპერატორი კომპანია MoneyGram Solana-ს ქსელში ვალიდატორი გახდა. Solana-ს ეკოსისტემაში გაწევრიანება MoneyGram-ს ბლოკჩეინის გამოყენებით ფინანსური სერვისების გაფართოვების შესაძლებლობას მისცემს.
ვალიდატორის რანგში MoneyGram-ს კრიპტოვალუტა SOL-ის სტეიკინგში განთავსება, ტრანზაქციების ბლოკების დამუშავება, ასევე Solana-ს ქსელის, რომელიც Proof-of-Stake (PoS) კონსენსუსის ალგორითმს იყენებს, უსაფრთხოების უზრუნველყოფა შეეძლება.
ფულადი გზავნილების ოპერატორი Solana Developer Platform-საც შეუერთდა, რაც მისთვის ბლოკჩეინზე დაფუძნებული ფინანსური პროდუქტების შექმნის ინსტრუმენტებზე წვდომას უზრუნველყოფს. პლატფორმა API-ს იყენებს და მზადაა ხელოვნური ინტელექტის ინტეგრირებისთვის. კომპანია Mastercard-თან ერთად, MoneyGram ამ პროექტის ერთ-ერთი პირველი მონაწილეა.
MoneyGram-ის აღმასრულებელი დირექტორისა და დირექტორთა საბჭოს თავმჯდომარის ენტონი სუჰუს (Anthony Soohoo) განაცხადებით, ორგანიზაციები, რომლებიც Solana-ს იყენებენ, მისი ეკოსისტემის გრძელვადიან მდგრადობაში საკუთარი წვლილი უნდა შეიტანონ. სუჰუს თქმით, მისი კომპანია ბლოკჩეინისა და სტაბილური კრიპტოვალუტების გამოყენებით გადახდის სერვისების განვითარებას ხუთ წელზე მეტია ახორციელებს. მან ბლოკჩეინი დაახასიათა როგორც ინსტრუმენტი, რომელიც ფულად გზავნილებს აჩქარებს და ამარტივებს.
„Solana Developer Platform-თან ჩვენი თანამშრომლობის მიზანს მომხმარებლის ადგილსამყოფელისა თუ გამოყენებული ვალუტის ფორმის მიუხედავად აქტივების შეუფერხებელი გადაადგილების უზრუნველყოფა წარმოადგენს.“ – დასძინა MoneyGram-ის პროდუქტებისა და ტექნოლოგიების განვითარების დირექტორმა ლუკ ტატლმა (Luke Tuttle).
გასულ წელს MoneyGram-მა დოლარში დენომინირებული სტაბილური კრიპტოვალუტის – USDC-ის გამოყენებით საერთაშორისო გადარიცხვებისთვის მობილური აპლიკაცია გამოუშვა.
ცოტა ხნის წინ, MoneyGram-მა ბლოკჩეინ Stellar-ზე საკუთარი სტაბილური კრიპტოვალუტის – MGUSD-ის გამოშვების შესახებ გამოაცხადა. თავდაპირველად, ახალი პროდუქტი ხელმისაწვდომი მხოლოდ აშშ-ის მომხმარებლებისთვის იქნება.
სიახლეების გამოწერა
