კრიპტო მილიარდერების სიას შვიდი სახელი დაემატა

კრიპტო მილიარდერების სიას შვიდი სახელი დაემატა

Forbes-მა კრიპტო მილიარდერების სიას შვიდი ახალი სახელი დაამატა.

ციფრული აქტივების ბაზრის გლობალური განვითარების ფონზე, პოპულარულმა ბიზნეს გამოცემა Forbes-მა განაცხადა, რომ მსოფლიოს უმდიდრესი ადამიანების სიაში კრიპტო-მილიარდერთა რიცხვი გაიზარდა.

Forbes-მა იმ მილიარდერების ახალი რეიტინგი გამოაქვეყნა, რომლებმაც თავიანთი ქონება კრიპტოვალუტასთან დაკავშირებული საქმიანობით გამოიმუშავეს.

 ამჟამად კრიპტო ინდუსტრიის მდიდარი ადამიანების სიაში 19 მილიარდერია. სიას წელს შვიდი სახელი დაემატა.

რეიტინგს სათავეში კვლავაც  კრიპტოვალუტის ბირჟა Binance-ის დამფუძნებელი და ხელმძღვანელი ჩენპენ ჯაო (Changpeng Zhao) უდგას.  Forbes-ის მიხედვით ის მსოფლიოს ყველაზე მდიდარ ადამიანებს შორის მე-19 ადგილს იკავებს.

2021 წელს ჯაოს ქონება დაახლოებით 96 მილიარდი დოლარიდან 65 მილიარდ დოლარამდე შემცირდა.

თუმცა, Binance-ის აღმასრულებელმა დირექტორმა კრიპტო ინდუსტრიაში ლიდერის პოზიცია მაინც შეინარჩუნა.

მეორე ადგილი  24 მილიარდი დოლარის კაპიტალით FTX-ის დამფუძნებელმა და აღმასრულებელმა დირექტორმა, სემ ბანკმენ-ფრიდმა (Sam Bankman-Fried) დაიკავა. მისმა განცხადებებმა, რომ  თავისი ქონების უმეტესი ნაწილის გაცემას აპირებს, ის კრიპტოვალუტის სამყაროს რობინ ჰუდად აქცია. 

Coinbase-ის აღმასრულებელი დირექტორი და დამფუძნებელი ბრაიან არმსტრონგი (Brian Armstrong), 6,6 მილიარდი დოლარის კაპიტალით მესამე ადგილზეა.

ლიდერების სამეულში შესვლა ვერ მოახერხეს Ripple -ის კრის ლარსენმა და Gemini-ს ტყუპებმა ვინკელვოსებმა, რომელთა ქონება დაახლოებით 4 მილიარდი დოლარია.

რეიტინგში ახალწვეულებს შორისაა FTX-ის თანადამფუძნებელი და მთავარი ტექნიკური დირექტორი გარი ვანგი (Gary Wang) 5.6 მილიარდი დოლარის კაპიტალით, რომელიც მან კომპანიის 16%-იანი წილიდან  მიიღო.

კომპანია Web3 Alchemy-ის თანადამფუძნებლებმა ნიკილ ვისვანათანმა (Nikil Viswanathan) და ჯოზეფ ლაუმ (Joseph Lau) კი თითოეულმა 2.4 მილიარდი დოლარი გამოიმუშავეს.

NFT  სავაჭრო პლატფორმა OpenSea-ს დამფუძნებლებმა, დევინ ფინცერმა (Devin Finzer) და ალექს ატალამ (Alex Atallah) საკოლექციო ტოკენების ბაზარზე გამომუშავებული  2.2-2.2  მილიარდი დოლარით   Forbes-ის რეიტინგში ადგილი ასევე დაიკავეს.

გარდა ამისა, რეიტინგში შევიდა სამხრეთ კორეის ბირჟა Upbit-ის დამფუძნებელი, სონ ჩი-ჰიუნგი (Song Chi-hyung) 3.7 მილიარდი დოლარით და სამხრეთ კორეული კომპანიის Dunamu-ს აღმასრულებელი ვიცე-პრეზიდენტი, კიმ ჰიონ-ნიონი  (Kim Hyoung-nyon), რომელიც Upbit-ის აქციების თითქმის 13%-ს და  $1.9 მილიარდის კაპიტალს ფლობს.

შეგახსენებთ, რომ თებერვალში კრიპტოვალუტის ბირჟამ Binance  200 მილიონ დოლარად  ჟურნალ Forbes-ის წილი იყიდა და აშშ-ის გავლენიანი ბიზნეს გამოცემის სიდიდით მეორე აქციონერი გახდა.