აშშ-მ ჩრდილოეთ კორეა კრიპტოვალუტის ქურდობაში დაადანაშაულა
აშშ-ს მთავრობამ ჩრდილოეთ კორეელი ჰაკერები ამერიკულ ტექნოლოგიურ კომპანიებზე ციფრული აქტივების მოპარვის მიზნით თავდასხმაში დაადანაშაულა.
აშშ-ს სახაზინო დეპარტამენტმა FBI-სთან და კიბერუსაფრთხოების და ინფრასტრუქტურის უსაფრთხოების სააგენტოსთან (CISA) ერთად კიბერუსაფრთხოების შესახებ რჩევები გამოსცა,
რომლებიც ჩრდილოეთ კორეის მხრიდან ბლოკჩეინსა და კრიპტო ინდუსტრიაზე ჰაკერული თავდასხმების შესახებ გაფრთხილებას მოიცავს.
რეკომენდაციებში ნათქვამია, რომ აშშ-ს მთავრობა დიდი ხანია აკვირდება, როგორ ნადირობენ ჩრდილოეთ კორეელი კიბერკრიმინალები ახალი ტექნოლოგიების სფეროში მომუშავე ორგანიზაციებზე.
დოკუმენტში დასახელებულია თავდასხმების კონკრეტული სამიზნეები: დეცენტრალიზებული საფინანსო პროტოკოლები, კრიპტო ბირჟები, სარისკო კაპიტალის ფონდები და ციფრული აქტივების – კრიპტოვალუტებისა და NFT-ს ცალკეული მფლობელები.
ასეთი შეტევების შესამცირებლად ან თავიდან ასაცილებლად ექსპერტების მიერ რამდენიმე გზაა შეთავაზებული.
რეკომენდაციების ავტორების თქმით, თავდამსხმელები სახელმწიფოს მიერ არიან დაფინანსებული და ჩრდილოეთ კორეის ცნობილი ჰაკერული ორგანიზაციის, Lazarus Group-ის მსგავს ტაქტიკას იყენებენ.
აქტივების ქურდობის გასამარტივებლად, ჰაკერები მსხვერპლთა აპლიკაციებში მავნე პროგრამას ნერგავენ.
ფინანსთა სამინისტროს ექსპერტების გაფრთხილების მიხედვით, თავდამსხმელები TraiderTraitor-ის სტრატეგიას იყენებენ, რომლის დროსაც კომპანიების ინფრასტრუქტურაში შეჭრა ამ კომპანიების თანამშრომლებისთვის ფიშინგური შეტყობინებებით იწყება. უმეტესად მათთვის, ვინც უშუალოდ IT სექტორში მუშაობს.
ყველაზე ხშირად ესაა შეტყობინებები, რომლებიც თანამშრომლებს იმ ბმულზე გადასვლას მოუწოდებენ, რომელზეც განთავსებულია ვაკანსია მსხვერპლის ხელფასზე გაცილებით მაღალი ანაზღაურების შეთავაზებით.
ამერიკელი ექსპერტების თქმით, კრიმინალები მათთვის საინტერესო ქსელებში შესაღწევად ტაქტიკებისა და მეთოდების მთელ სპექტრს იყენებენ.
შეგახსენებთ, რომ თებერვალში გაერომ გამოაქვეყნა ანგარიში, რომელშიც ნათქვამია, რომ ჩრდილოეთ კორეამ ბირთვული რაკეტების განვითარება დააჩქარა და დაფინანსების მთავარ წყაროდ ციფრული ვალუტები აქცია.
- გამოგვეყვით ტელეგრამზე t.me/cryptonewsgeorgia
- დაემატეთ ჩვენს ჯგუფში Fb.me/groups/cryptonewsgeorgia
Comments (No)