შეერთებულ შტატებს ციფრული დოლარი არ სჭირდება

შეერთებულ შტატებს ციფრული დოლარი არ სჭირდება

აშშ-ს ფედერალური რეზერვის საბჭოს წევრი კრისტოფერ უოლერი  სახელმწიფო ციფრული 

 ვალუტის (CBDC) გამოშვების იდეის წინააღმდეგ გამოვიდა.

კრისტოფერ უოლერმა (Christopher Waller) განცხადება ჰარვარდის უნივერსიტეტში გამოსვლისას გააკეთა.

 მისი თქმით, მიუხედავად იმისა, რომ ის არ არის ეროვნული უსაფრთხოების ექსპერტი, არის საკითხი, სადაც ეკონომიკა, CBDC და ეროვნული უსაფრთხოება ერთმანეთს ერწყმის და ეს დოლარის როლია.

უოლერის განმარტებით, მას CBDC-ის მხარდამჭერების მიერ წამოყენებული არგუმენტები უკიდურესად სკეპტიკურად მიაჩნია.

მათი განცხადებით, ციფრულმა დოლარმა შესაძლოა თაღლითობის, ქურდობისა და ფულის გათეთრების პრობლემის მოგვარება ან გადახდების გაუმჯობესება  არსებულ ტექნოლოგიებზე უკეთ შეძლოს.

„დოლარის უპირატესობის განმსაზღვრელი ფაქტორები არ არის ტექნოლოგიური, არამედ მოიცავს საკმარის მოთხოვნას, ლიკვიდურ ბაზარს აშშ-ს სახაზინო ფასიანი ქაღალდებისა და საკრედიტო ვალდებულებებისთვის, ასევე აშშ-ს პოლიტიკური და ეკონომიკური სისტემების სტაბილურობას.“ – აღნიშნა უოლერმა.

მისი აზრით, CBDC-ის ამოქმედება დოლარის როგორც ანგარიშსწორებისა და დაგროვების ერთეულის ფუნქციებზე გავლენას ვერ მოახდენს და ნაკლებად სავარაუდოა რაიმე მატერიალური სარგებელი ჰქონდეს. 

უოლერის თვალსაზრისს ამერიკული კვლევითი ცენტრის Bitcoin Policy-ის ანალიტიკოსებიც იზიარებენ. მათ ხაზგასმით აღნიშნეს, რომ სამთავრობო კრიპტოვალუტები  ფინანსური სისტემის მიმდინარე პრობლემების გადაჭრას ვერ დაეხმარება. CBDC-ები მხოლოდ სახელმწიფოს მხრიდან მოქალაქეების კონტროლს შეუწყობენ ხელს.