აუცილებელია კრიპტო ინდუსტრიამ სტანდარტები აამაღლოს

აუცილებელია  კრიპტო ინდუსტრიამ  სტანდარტები აამაღლოს

კრიპტოვალუტის ბირჟა Kraken-ის აღმასრულებელი დირექტორი და თანადამფუძნებელი მიიჩნევს, რომ კრიპტოვალუტის ინდუსტრია თავის რიგებში გამდიდრებაზე ორიენტირებულ აშკარა თაღლითებს  ძალიან ადვილად იღებს, რაც ძალიან ძვირი უჯდება.

ჯესი პაუელმა (Jesse Powell) კრიპტო ბირჟა FTX-ის გარშემო შექმნილ კრიზისზე ისაუბრა. ბიზნესმენის თქმით, კრიპტო ინდუსტრიის მონაწილეთა უმეტესობა ზედმეტად მიმნდობია.

პაუელი დარწმუნებულია, რომ არსებულმა ვითარებამ  ინდუსტრიის წარმომადგენლებს თაღლითებისა და არაკომპეტენტური ადამიანების სიმრავლეზე თვალი უნდა აუხილოს:

 „ჩვენი მიდგომა თაღლითებისთვის  იდეალურ სამიზნედ გვაქცევს : კრიპტო ინდუსტრიის ზოგიერთი მონაწილე ზოგჯერ  პირდაპირ ამბობს, რომ ინდუსტრიაში ფულის გამო მოვიდა და არა ინოვაციებისა და ტექნოლოგიებისთვის და მათი გულწრფელობით გაოცებულნი ჩვენ მათ ვიღებთ. მაგრამ მაშინ, როცა კატასტროფა დატრიალდება, გვიკვირს ეს როგორ მოხდა. ვფიქრობ,  სტანდარტები უნდა ავიმაღლოთ.“

Kraken-ის ხელმძღვანელმა ხაზგასმით აღნიშნა, რომ FTX-თან დაკავშირებული სიტუაცია მის კომპანიასა და მომხმარებლებზე მნიშვნელოვან გავლენას არ მოახდენს.

თუმცა აღნიშნა, რომ ზოგადად, კრიპტო ინდუსტრიისთვის ზიანი დიდი იქნება.

 პაუელის თქმით, ამ მასშტაბის საფონდო ბირჟის ჩამოშლა ბიტკოინისა და კრიპტოვალუტის ყველა მოძულისთვის დიდი საჩუქარია,

რადგან იქმნება საბაბი, რომელსაც ეს ხალხი ინდუსტრიაზე თავდასხმის გასამართლებლად ელოდა.

მანამდე საინვესტიციო ბანკ JPMorgan-ის ანალიტიკოსებმა განაცხადეს, რომ ბიტკოინის ვარდნა არ დასრულებულა და ბირჟა FTX-ის ლიკვიდურობის ნაკლებობასთან დაკავშირებულმა კრიზისმა შეიძლება  კასკადური ლიკვიდაციები გამოიწვიოს.