2022-ში ჰაკერებისა და თაღლითებისგან ინდუსტრია 3.9 მილიარდით დაზარალდა

2022-ში ჰაკერებისა და თაღლითებისგან ინდუსტრია 3.9 მილიარდი დოლარით დაზარალდა

კრიპტოვალუტების უსაფრთხოების სფეროში მომუშავე კომპანია Immunefi-ს ცნობით, 2022 წელს ციფრული აქტივების ინდუსტრიაში თაღლითობისა და ჰაკერული შეტევების ყველაზე დიდი რაოდენობა დაფიქსირდა.

Immunefi-ს თანახმად, ბოროტმოქმედებმა მთლიანობაში 3,9 მილიარდი დოლარის აქტივები მოიპარეს.

ამასთან, ამ მაჩვენებლის ძირითადი ნაწილი – 2,36 მილიარდი დოლარი, მხოლოდ ხუთ ჰაკერულ თავდასხმაზე მოდის.

ჰაკერული თავდასხმების შედეგია მოპარული თანხების მთლიანი მოცულობის აბსოლუტური უმრავლესობაც – 95,6% . თაღლითობისა და გამოძალვის სხვა სქემების შედეგად მითვისებულმა თანხებმა კი მთლიანი მოცულობის მხოლოდ 4.4% შეადგინეს.

ჯამში 2022 წელს 134 ჰაკერული თავდასხმა დაფიქსირდა, რაც 2021 წელთან შედარებით 22 ინციდენტით მეტია.

ჰაკერების თავდასხმებისგან ძირითადად DeFi პროექტები დაზარალდა. დეცენტრალიზებული ფინანსების ინდუსტრიაზე მთლიანი დანაკარგების 80,5% მოდის, რაც რიცხობრივად 3,18 მილიარდ დოლარს შეადგენს და 2021 წლის მაჩვენებელთან შედარებით 56,2%-ით მეტია.

ყველაზე ხშირად ჰაკერები პროექტებს BNB Chain-სა და Ethereum-ზე ესხმოდნენ თავს. BNB Chain-ის ქსელზე 65 ინციდენტი დაფიქსირდა, ხოლო Ethereum-ის ქსელზე 49.

აღსანიშნავია, რომ მთლიანი დანაკარგიდან მხოლოდ 5,2%-ის, ანუ 204 მილიონი დოლარის დაბრუნება მოხერხდა.

2022 წლის ყველაზე ფართომასშტაბიანი ჰაკერული შეტევები Ronin Network gateway bridge-ზე (625 მილიონი დოლარის დანაკარგი) და ბირჟა FTX-ზე (370-400 მილიონ დოლარამდე დანაკარგი) განხორციელდა.

კომპანია CertiK-ის ანალიტიკოსების პროგნოზით, კრიპტო ინდუსტრიისთვის არანაკლებ რთული იქნება 2023 წელიც.

მათი თქმით, ბოროტმოქმედებს მეთოდები უკვე შემუშავებული აქვთ, ბაზარი კი ახლა დაუცველ მდგომარეობაშია.