Genesis-ის გაკოტრებით დაზარალებული Gemini პერსონალს ამცირებს

Genesis-ის გაკოტრებით დაზარალებული Gemini პერსონალს ამცირებს

სავაჭრო პლატფორმამ Gemini, რომელიც კრიპტოკრედიტორ Genesis-ის გაკოტრების შედეგად დაზარალდა, თანამშრომელთა შემცირების მესამე ტალღის შესახებ გამოაცხადა.

გასული წლის ზაფხულიდან მოყოლებული, კრიპტო ბაზრის მაღალი ვოლატილობის ფონზე სავაჭრო პლატფორმამ Gemini თანამშრომლების რაოდენობის ოპტიმიზაცია დაიწყო.

ივნისში ბირჟამ თანამშრომელთა რაოდენობა 10%-ით, ხოლო ივლისში კი 7%-ით შეამცირა.

როგორც Gemini-ის თანადამფუძნებლის კამერონ ვინკლევოსის  (Cameron Winklevoss) მიმართვადან ირკვევა,  ბირჟის მენეჯმენტი იმედოვნებდა, რომ ასეთი ზომების მიღებას თავიდან აიცილებდა, მაგრამ გადაწყვეტილების გადახედვა მოუწიათ.

მენეჯმენტი მიზეზად მძიმე მაკროეკონომიკურ ვითარებასა და კრიპტოვალუტის სფეროს წარმომადგენელთა მიერ ჩადენილ უპრეცედენტო თაღლითობის შემთხვევებს ასახელებს.

ბირჟას მნიშვნელოვანი ზარალი  კრიპტო კრედიტორმა Genesis Capital მიაყენა, რომელთანაც პროგრამა Gemini Earn-ის ფარგლებში თანამშრომლობდა.  პროგრამა მომხმარებლებს დეპოზიტის თანხის 8%-ს სთავაზობდა.

გასული წლის ნოემბრის შუა რიცხვებში Genesis-მა თანხების გატანა შეაჩერა და Gemini-ის  340 000-მდე კლიენტის კუთვნილი დაახლოებით 900 მილიონამდე აშშ დოლარი გაყინა. გასულ კვირას, 20 იანვარს, Genesis-მა გაკოტრების შესახებ განაცხადი შეიტანა.

გარდა ამისა, Gemini-სა და Genesis-ის  წინააღმდეგ სარჩელი აშშ-ს ფასიანი ქაღალდებისა და ბირჟის კომისიამ (SEC) შეიტანა.

კომპანიებს პროგრამა Gemini Earn-ის მეშვეობით აშშ-ს ფასიანი ქაღალდების შესახებ კანონის დარღვევა ედებათ ბრალად. მანამდე მარეგულირებელმა ანალოგიური ბრალდება დაკრედიტების პლატფორმა  BlockFi-ის წარუდგინა და კომპანიას 100 მილიონი დოლარის ჯარიმის გადახდა დააკისრა.