by Maria 
Binance სამი ალტკოინის დელისტინგს გეგმავს
ვაჭრობის მოცულობის მიხედვით მსოფლიოში უდიდესმა კრიპტოვალუტის ბირჟა Binance-მა სამი ალტკოინის სავაჭრო წყვილების დელისტინგის შესახებ გამოაცხადა. ესენია BakeryToken (BAKE), Hifi Finance (HIFI) და Self Chain (SLF).
17 სექტემბრიდან ყველა ორდერი ავტომატურად დაიხურება და დასახელებული ალტკოინების წყვილების სავაჭრო ბოტები ფუნქციონირებას შეწყვეტს. ბირჟამ თანხების დაკარგვის თავიდან ასაცილებლად მომხმარებლებს სავაჭრო ბოტების განახლება ან გაუქმება ურჩია.
„თუ მონეტები სტანდარტებს არ აკმაყოფილებს, ჩვენ ანალიზს ვატარებთ და შესაძლოა ისინი სიიდან ამოვშალოთ. ჩვენი პრიორიტეტი მომხმარებლებისთვის საუკეთესო მომსახურებისა და უსაფრთხოების უზრუნველყოფაა.“ – განაცხადა Binance-მა.
ბირჟის ცნობით, სამ მითითებულ ალტკოინში დეპოზიტები 18 სექტემბრის შემდეგ აღარ განხორციელდება. თანხის გატანა შესაძლებელი 18 ნოემბრამდე იქნება, რის შემდეგაც ტოკენების მხარდაჭერა სრულად შეწყდება.
Binance მომხმარებლებს 10 სექტემბრამდე Spot Copy Trading პორტფელების განახლებას ურჩევს, რადგან ამ თარიღიდან ბირჟის კოპი ტრეიდინგ სერვისში BAKE, HIFI და SLF ტოკენები აღარ აისახება. 10 სექტემბრის შემდეგ დარჩენილი აქტივები ავტომატურად გაიყიდება საბაზრო ღირებულებით ან თუ გაყიდვა შეუძლებელია, გადაირიცხება სპოტურ ანგარიშზე.
მანამდე Binance-მა პლატფორმაზე აშშ-ის პრეზიდენტის დონალდ ტრამპის ოჯახის საკუთრებაში არსებული World Liberty Financial-ის ტოკენის ლისტინგის შესახებ გამოაცხადა.
