by Giorgi 
Binance-ს შესაძლოა ევროკავშირში ოპერირება აეკრძალოს
1 ივლისიდან მსოფლიოს უდიდეს კრიპტო ბირჟა Binance-ს ევროკავშირში მომხმარებელთათვის მომსახურების გაწევის უფლების დაკარგვის საფრთხე ემუქრება. სააგენტო Reuters-ის ცნობით, კომპანიის განაცხადი ევროკავშირის MiCA-ს (Markets in Crypto‑Assets Regulation) ფარგლებში ლიცენზიის მისაღებად უარყოფილი იქნება.
ევროკავშირის კრიპტო ბაზრის რეგულაციების თანახმად, კავშირის ფარგლებში ოპერირების გასაგრძელებლად კრიპტო კომპანიები ვალდებულნი არიან ივნისის ბოლომდე MiCA-სთან თავსებადი ლიცენზია მიიღონ. Binance-მა განაცხადი საბერძნეთის კაპიტალის ბაზრის კომისიაში (HCMC) შეიტანა. დამტკიცების შემთხვევაში, ლიცენზია მთელი ევროკავშირის ტერიტორიაზე იმოქმედებდა.
ბირჟის წარმომადგენლების მტკიცებით, მათ MiCA-ს ყველა აუცილებელი მოთხოვნა დააკმაყოფილეს. Binance-ის წარმომადგენელმა Reuters-ს განუცხადა, რომ ბირჟა ევროპელ მარეგულირებლებთან ბოლო 18 თვის განმავლობაში თანამშრომლობდა და HCMC-ის განაცხადის პროცესი წარმატებით დაასრულა. კომისიამ განაცხადი განიხილა და დაადგინა, რომ ის MiiCA-ს მოთხოვნებთან თავსებადია.
„HCMC-ს რაიმე ოფიციალური საპირისპირო მიმართვა არ გაუკეთებია “ – განაცხადა Binance-მა.
თებერვალში, Binance-ის თანააღმასრულებელმა დირექტორმა რიჩარდ ტენგმა (Richard Teng) აღნიშნა, რომ საბერძნეთი ქვეყნის „ადამიანური კაპიტალის, უსაფრთხოებისა და დაცულობის“ გამო შეირჩა.
მაისის მონაცემებით MiCA-ს ლიცენზიები მხოლოდ 194 კომპანიამ, მათ შორის ბანკებმა, მიიღო. მაშინ, როცა 2024 წლის მონაცემებით, ევროკავშირის ბაზარზე 3000-ზე მეტი კრიპტო კომპანია ოპერირებდა.
ევროკავშირის ყველა წევრ სახელმწიფოს კანონმდებლობის MiiCA-ს რეგულაციებთან შესაბამისობაში მოყვანისთვის ვადა 1 ივლისამდე ჰქონდათ. თუმცა, ვადა ყველამ არ დაიცვა . პოლონეთის პრეზიდენტმა კრიპტოვალუტის კანონპროექტს ვეტო მესამედ დაადო .
სიახლეების გამოწერა
