by Maria 
Binance-ის დამფუძნებელი სენატორ უორენს ცილისწამებისთვის უჩივლებს
უმსხვილესი კრიპტო ბირჟა Binance-ის დამფუძნებელი ჩენპენ ჯაო (Changpeng Zhao) მექრთამეობასა და კორუფციაში მონაწილეობის ცილისმწამებლური ბრალდებების გამო მასაჩუსეტსის შტატის დემოკრატი სენატორის, ელიზაბეტ უორენის (Elizabeth Warren) წინააღმდეგ სარჩელის შეტანას გეგმავს.
ინფორმაცია ჯაოს ადვოკატმა ტერეზა გუდი გილენმა (Teresa Goody Guillén) დაადასტურა : თუ უორენი თავის განცხადებებს არ უარყოფს, Binance-ის ყოფილი აღმასრულებელი დირექტორი მზადაა სასამართლოს მიმართოს. საქმე ეხება უორენის მიერ სოციალურ მედია პლატფორმა X-ზე გამოქვეყნებულ ტვიტს, რომელშიც სენატორმა განაცხადა, რომ ჯაომ „ ფულის გათეთრების ნაწილში დანაშაული აღიარა “ და მიანიშნა, რომ შესაძლოა მან შეწყალების სანაცვლოდ აშშ-ის პრეზიდენტი დონალდ ტრამპი მოისყიდა.
გილენის თქმით, უორენის განცხადებები კონკრეტული ფაქტებს არ ეყრდნობა. 2023 წლის ნოემბერში ჯაომ თავი დამნაშავედ ბრალდების ერთადერთ პუნქტში ცნო – აღიარა, რომ Binance-ზე ფულის გათეთრების საწინააღმდეგო კანონმდებლობის (AML) შესრულება ვერ უზრუნველყო. ეს კი საბანკო საიდუმლოების შესახებ კანონის დარღვევას წარმოადგენს და არაფერი აქვს საერთო ფულის გათეთრებასთან. 2024 წელს ჯაომ ციხეში ოთხი თვე გაატარა.
ადვოკატის განმარტებით, მისი კლიენტი ვერ გაჩუმდება მაშინ, როცა აშშ-ის სენატორი თავის თანამდებობას ბოროტად იყენებს და მისი რეპუტაციის დამაზიანებელ განცხადებებს არაერთგზის აქვეყვენებს. ადვოკატმა უორენს ყველა განცხადების დაუყოვნებლივ წაშლა მოსთხოვა.
ეს პირველი შემთხვევა არ არის, როდესაც ჯაო ცილისწამებისთვის სარჩელის შეტანით იმუქრება. წარსულში ბიზნესმენმა Bloomberg Businessweek-ს 2022 წელს გამოქვეყნებული სტატიის გამო უჩივლა, რომელშიც Binance პონცის სქემად იყო მოხსენიებული. ჟურნალმა საჯაროდ მოიხადა ბოდიში და ჯაოს კომპენსაცია გადაუხადა.
სიახლეების გამოწერა
