Binance-ის მიზანი მილიარდი მომხმარებლის მოზიდვაა

Binance-ის მიზანი მილიარდი მომხმარებლის მოზიდვაა

მსოფლიოში უმსხვილესი კრიპტო ბირჟის, Binance-ის აღმასრულებელი დირექტორის თქმით, Binance-ის მიზანი კრიპტოვალუტის სფეროში მილიარდი მომხმარებლის მოზიდვაა.

ეს განცხადება რიჩარდ ტენგმა (Richard Teng) მას შემდეგ გააკეთა, რაც 8 ივნისს Binance-ის რეგისტრირებული მომხმარებლების რიცხვმა მსოფლიო მასშტაბით 200 მილიონს მიაღწია. ტენგის თქმით, ბირჟაზე მომხმარებელთა რაოდენობა 100 დან 200 მილიონამდე მხოლოდ 26 თვეში გაიზარდა.

მან ეს სწრაფი ზრდა კრიპტო ინდუსტრიის „ლანდშაფტის“ ცვლილებით ახსნა : კრიპტოვალუტებისა და მათი უსაზღვრო შესაძლებლობების შესახებ სულ უფრო მეტი ადამიანი იგებს. ეს ინდუსტრიის სიმწიფესა და მდგრად ზრდაზე მეტყველებს, დასძინა ტენგმა.

Binance-ის აღმასრულებელი დირექტორის თქმით, ბირჟა მილიარდი მომხმარებლის მოზიდვას, მოსახლეობის სხვადასხვა სეგმენტისთვის ფინანსურ სერვისებზე წვდომის გაფართოებისთვის გეგმავს.

ტენგმა აღნიშნა, რომ მილიარდ მომხმარებლამდე მისასვლელი გზა ადვილი არ იქნება. ამისთვის მთელს მსოფლიოში კრიპტოვალუტის მფლობელების ახლანდელი რაოდენობა უნდა გაორმაგდეს და პლანეტის ყოველ მერვე მოსახლეს კრიპტოვალუტით სარგებლობა შეეძლოს.

ციფრული აქტივების მასობრივი დანერგვა ასევე გლობალური მასშტაბით მარეგულირებელთა პოლიტიკურ მხარდაჭერასაც მოითხოვს.

ეს განსაკუთრებით შეერთებულ შტატებს ეხება, სადაც კრიპტოვალუტის 50 მილიონამდე მფლობელია, რაც გლობალური მომხმარებელთა ბაზის დაახლოებით 10%-ს შეადგენს.

აშშ-ის ფასიანი ქაღალდებისა და ბირჟების კომისია (SEC) სხვა მარეგულირებელ ორგანოებთან დისკუსიებს იმის შესახებ აწარმოებს, თუ როგორ უნდა მოხდეს ინდუსტრიის უკეთ რეგულირება.

ტენგი იმედოვნებს, რომ აშშ-ის მომავალი საპრეზიდენტო არჩევნები კრიპტოვალუტების რეგულირებაში გარკვევას ხელს შეუწყობს, რადგან რესპუბლიკელი პრეზიდენტობის კანდიდატი დონალდ ტრამპი არჩევის შემთხვევაში კრიპტო ინდუსტრიას ნათელ მომავალს ჰპირდება.