by Giorgi 
Binance-ის მფლობელი ჰამასის დახმარებაში დაადანაშაულეს
2023 წლის 7 ოქტომბერს ჰამასის ტერორისტული თავდასხმის დროს მძევლებისა და მსხვერპლის ოჯახებმა კრიპტოვალუტის ბირჟა Binance-ის დამფუძნებლისა და საკონტროლო პაკეტის მფლობელის, ჩენპენ ჯაოს (Changpeng Zhao) წინააღმდეგ კოლექტიური სარჩელი შეიტანეს.
ბიზნესმენის წინააღმდეგ წაყენებული ბრალდებები რელიგიურ-პოლიტიკური მოძრაობისთვის კრიპტოვალუტის სახით მილიონობით დოლარის ტრანზაქციების განხორციელებას ეხება.
სარჩელი კალიფორნიის უზენაის სასამართლოში იურიდიულმა ფირმამ Dr. Gideon Fisher & Co.-მ შეიტანა. იგი 100-ზე მეტი დაზარალებულისა და მათი ოჯახის წევრების სარჩელებს აერთიანებს. მოსარჩელეების განცხადებით, Binance-მა და ჯაომ ჰამასს კრიპტო მომსახურება განზრახ ან დაუდევრობით მიაწოდეს.
მოსარჩლეების თქმით, ჰამასმა Binance-ის მეშვეობით 2021 წლის აგვისტოდან 2023 წლის ივნისამდე პერიოდში დაახლოებით 41 მილიონი დოლარის კრიპტოაქტივები გადარიცხა, ხოლო კიდევ ერთმა ტერორისტულმა დაჯგუფებამ, „ისლამურმა ჯიჰადმა“, დაახლოებით 93 მილიონი დოლარის.
იურიდიულ დოკუმენტში ნათქვამია, რომ ჰამასისთვის სანქციებისა და ტრადიციული საბანკო კონტროლის გვერდის ავლის შესაძლებლობის მიცემისთვის კრიპტობირჟამ და მისმა მფლობელმა აშშ-ის ტერორიზმის წინააღმდეგ ბრძოლის კანონები დაარღვიეს. ამის საფუძველზე, ბრალდებულებს პალესტინის ტერორისტული თავდასხმების დაფინანსების ხელშეწყობაში, მათ შორის 7 ოქტომბერს ღაზას სექტორში ისრაელის სასაზღვრო მოშავ ნეტივ ჰა’ასარას მაცხოვრებლებზე თავდასხმაში ადანაშაულებენ.
ოპერაცია „ალ-აქსას წყალდიდობის“ დროს, რომელიც ჰამასის სამხედრო ფრთამ, იზედინ ალ-ქასამის ბრიგადებმა განახორციელეს, 1200-ზე მეტი მცხოვრები დაიღუპა.
მოსარჩელეები ჯაოსგან მიღებული ზიანისთვის, ემოციური სტრესისთვის, დაკარგული ფულისა და სამედიცინო ხარჯებისთვის კომპენსაციას ითხოვენ.
„განსხვავებით ორი წინა სარჩელისგან, რომლებიც აშშ-ში 7 ოქტომბერს შევიტანეთ და რომელთა ჯამური ღირებულება 1 მილიარდ დოლარს შეადგენდა, ეს სარჩელი მიმართულია საერთაშორისო ბიზნეს მაგნატის წინააღმდეგ, რომლის ქონება ათობით მილიარდ დოლარს შეადგენს და გავლენას ახდენს არა მხოლოდ ამერიკელ მსხვერპლზე, არამედ ისრაელელებზეც, რომლებსაც ამერიკასთან კავშირები არ გააჩნიათ.“ – განაცხადა ადვოკატმა გიდეონ ფიშერმა (Gideon Fisher).
ეს არის პირველი სარჩელი, რომელიც „ჰამასის“ მსხვერპლებმა Binance-ისა და მისი მენეჯმენტის წინააღმდეგ შეიტანეს.
წყარო: https://www.jpost.com/international/article-875097
სიახლეების გამოწერა
