Binance კანადის ბაზარს ტოვებს

Binance კანადის ბაზარს ტოვებს

კრიპტოვალუტის უმსხვილესი ბირჟა Binance-ის განცხადებით, ის სხვა ცნობილ კრიპტოვალუტის კომპანიებს უერთდება და კანადურ ბაზარს „პროაქტიულად“ ტოვებს.

კრიპტო ბირჟის კანადიდან გასვლა ქვეყანაში ციფრული აქტივების სფეროს რეგულირებასთან არსებულ სიტუაციას უკავშირდება.

კომპანიის წარმომადგენლებმა ხაზგასმით  აღნიშნეს, რომ კანადელი კლიენტების ვაჭრობის მოცულობა არც თუ ისე დიდი იყო, მაგრამ Binance-ს ამ ქვეყნის მიმართ ყოველთვის „სენტიმენტალური“ დამოკიდებულება ჰქონდა, რადგან ბირჟის დამფუძნებელი ჩენპენ ჯაო (Changpeng Zhao) კანადის მოქალაქეა.

„ გვინდა მადლობა გადავუხადოთ იმ მარეგულირებლებს, რომლებიც ჩვენთან ერთად კანადელი მომხმარებლების მოთხოვნების დაცვასა დაკმაყოფილებაზე მუშაობდნენ. ჩვენ კანადის ბლოკჩეინის ინდუსტრიაზე დიდ იმედებს ვამყარებდით.

სამწუხაროდ, ახალი რეგულაციები ამ ბაზარს ჩვენი კომპანიისთვის ნაკლებად შესაფერისს ხდის. ჩვენ ამ გადაწყვეტილების მიღების თავიდან არიდებას ვცდილობდით და ჩვენი კანადელი მომხმარებლებლების დასაცავად ყველა შესაძლო და გონივრულ გზას მივმართეთ, მაგრამ ცხადი გახდა, რომ ასეთი გზა არ არსებობს. საჭირო ინფორმაციას იმის შესახებ, თუ როგორ უნდა მოიქცეს შემდეგში თითოეული კანადელი მომხმარებელი, ისინი ელ.წერილის სახით მიიღებენ.

ჩვენ არ ვეთანხმებით მარეგულირებელ პოლიტიკას და გვჯერა, რომ ერთ დღეს კვლავ დავბრუნდებით ამ ბაზარზე და კანადელ მომხმარებლებს ციფრული აქტივების ფართო სპექტრზე წვდომა კვლავაც  ექნებათ. “ – განაცხადა ბირჟამ Twitter-ზე.

მანამდე კანადელი მომხმარებლებისთვის წვდომა პოპულარულმა დეცენტრალიზებულმა ბირჟამ dYdX  შეზღუდა.