Binance-მა ისრაელში საქმიანობა შეაჩერა

Binance-მა ისრაელში საქმიანობა შეაჩერა

კრიპტოვალუტის ბირჟამ Binance ისრაელის მოქალაქეების მომსახურება, ასევე შეკელისა და ივრითის მხარდაჭერა შეწყვიტა.

ისრაელის კაპიტალის ბაზრების, სადაზღვევო და შემნახველი ორგანოების ზედამხედველობის სამსახურმა, რომელიც 

 კრიპტო ბირჟების ლიცენზირებაზეა პასუხისმგებელი, Binance-ს იმ ლიცენზიების წარდგენა მოსთხოვა, რომლებითაც პლატფორმა ადგილობრივ ბაზარზე მომსახურებას ახორციელებს. იმის გამო, რომ ბირჟას მსგავსი ლიცენზია არ გააჩნია, მარეგულირებელმა კომპანიის საქმიანობა შეაჩერა:

„სანამ ხელისუფლება ლიცენზირების საკითხს არ განიხილავს, Binance-მა ისრაელის მოქალაქეებისთვის სერვისების მიწოდება და ყველა სხვა სახის საქმიანობა უნდა შეწყვიტოს.“

Binance-ის მიმართ ადგილობრივი მარეგულირებლის ინტერესი განპირობებულია იმით, რომ კრიპტოვალუტის პლატფორმას ადგილობრივი კომპანიებისგან განსხვავებით, ქვეყანაში ოპერირების ლიცენზიის მოპოვების შესახებ განცხადება ადმინისტრაციაში არ შეუტანია.

მარეგულირებელი მიიჩნევს, რომ არარეგისტრირებული ბირჟა, რომლის საქმიანობაც სახელმწიფოს მიერ არ კონტროლდება, კრიპტოვალუტის ინვესტორებისთვის საფრთხეს წარმოადგენს.

ისრაელში მოქმედი კრიპტოვალუტის ბირჟის CryptoJungle-ის დამფუძნებელი ბენ სამოხა (Ben Samocha) აცხადებს, რომ Binance-მა  შეკელისა და ივრითის მხარდაჭერა გააუქმა. 

ბირჟის მომხმარებელთა მხარდაჭერის სამსახურის განცხადებით, ეს ნაბიჯები რეგულირების საჭიროებიდან გამომდინარე გადაიდგა და ამ დროისთვის უფრო დეტალურ ინფორმაციას ვერ გასცემენ.

Binance-მა ისრაელში საქმიანობა შეაჩერა. პლატფორმაზე ქვეყნის 200 000-მდე მოქალაქე იყო დარეგისტრირებული.

ისრაელი არ არის პირველი სახელმწიფო, რომლის მარეგულირებლებმაც Binance-ს აკრძალვები დაუწესეს. Binance ბირჟის დევნა მწვავე ფაზაში მას შემდეგ შევიდა, რაც ჩინეთის სახალხო ბანკმა, ჩინეთის სახალხო რესპუბლიკის საზოგადოებრივი უსაფრთხოების სამინისტრომ და სხვა ინსტიტუტებმა  მოქალაქეებს უცხოური კრიპტოვალუტის ბირჟების გამოყენება აუკრძალეს.

ივნისში გაერთიანებული სამეფოს ფინანსური ზედამხედველობის სამსახურმა  Binance-ის მენეჯმენტი გააფრთხილა, რომ ბირჟა ქვეყანაში საქმიანობას ვერ განახორციელებდა . ერთი თვის შემდეგ კრიპტოვალუტის ბირჟამ Binance გამოაცხადა, რომ შეწყვეტს კრიპტოვალუტის წარმოებულებით ვაჭრობას გერმანიაში, იტალიასა და ნიდერლანდებში. ბირჟის ყველა ოპერაციის დახურვა ასევე მალაიზიის მარეგულირებელმაც მოითხოვა.

წყარო: https://bits.media/