Binance მთავრობებს ბიტკოინთან დაკავშირებით კონსულტაციებს უწევს

Binance მთავრობებს ბიტკოინთან დაკავშირებით კონსულტაციებს უწევს

Binance-ის აღმასრულებელმა დირექტორმა რიჩარდ ტენგმა Financial Times-ს განუცხადა, რომ ბირჟის ექსპერტები რიგ ქვეყნებს, მათ შორის პაკისტანსა და ყირგიზეთს, კრიპტოვალუტის რეგულაციების შემუშავებასა და ბიტკოინით ეროვნული რეზერვების შექმნაში აქტიურად ეხმარებიან.

რიჩარდ ტენგმა (Richard Teng) ხაზგასმით აღნიშნა, რომ Binance ეროვნული ციფრული ფინანსური ინდუსტრიების მდგრადი განვითარებისთვის საჭირო სამართლებრივი ჩარჩოსა და ინფრასტრუქტურის შექმნაში დახმარების მიზნით დაინტერესებული ქვეყნების მთავრობებთან მჭიდროდ თანამშრომლობს.

„მას შემდეგ, რაც ძირითადად ხელსაყრელი პოლიტიკური გარემოს წყალობით, განსაკუთრებით აშშ-ში, Binance-ის იმიჯი გაუმჯობესდა, ჩვენ მთავრობებისა და სუვერენული ფონდებისგან საკონსულტაციო და ტექნოლოგიური დახმარების გაწევასთან დაკავშირებით უამრავი მოთხოვნა მივიღეთ.“- განაცხადა ტენგმა.

კერძოდ, ბირჟა რიგ ქვეყნებს ბიტკოინის სუვერენული სტრატეგიული რეზერვების შექმნისთვის კანონმდებლობის შემუშავებაში კონსულტაციებს უწევს.

ტენგის თქმით, ციფრული აქტივების სფეროში საჯარო პოლიტიკის ფორმირების საკითხებში Binance-ის იმიჯის გამყარებისკენ გადადგმულ მნიშვნელოვან ნაბიჯს 2025 წლის აპრილში პაკისტანსა და ყირგიზეთში კრიპტოვალუტის პოლიტიკის მრჩევლად Binance-ის დამფუძნებლის – ჩენპენ ჯაოს დანიშვნა წარმოადგენს.

პაკისტანში Binance-ის მთავარი აქციონერი და ყოფილი აღმასრულებელი დირექტორი ფინანსთა სამინისტროსთან, ცენტრალურ ბანკთან და ფასიანი ქაღალდების კომისიასთან თანამშრომლობს. ყირგიზეთში ჯაომ ბირჟის სახელით ბლოკჩეინ ინფრასტრუქტურის მხარდასაჭერად ხელი მოაწერა ურთიერთგაგების მემორანდუმს, რითაც რეგიონში Binance-ის აქტიური როლი გაამყარა.