Binance-ის დამფუძნებელმა ყველაზე მდგრადი მემკოინი დაასახელა

Binance-ის დამფუძნებელმა ყველაზე მდგრადი მემკოინი დაასახელა

ვაჭრობის მოცულობით ყველაზე დიდი კრიპტო ბირჟის, Binance-ის დამფუძნებელმა ჩანგპენგ ჟაომ (Changpeng Zhao) დავოსის მსოფლიო ეკონომიკურ ფორუმზე, მისი აზრით ყველაზე მდგრადი მემკოინი დაასახელა.

ბიზნესმენის თქმით, „მაღალი კულტურული მნიშვნელობის“ მქონე ტოკენებმა შესაძლოა აქტუალურობა სხვებზე დიდხანს შეინარჩუნონ. ჟაომ ყველაზე მდგრად მემკოინად Dogecoin გამოაცხადა. მიზეზად კი მისი სიცოცხლისუნარიანობა და შედარებით მაღალი – 20.6 მილიარდი დოლარის საბაზრო კაპიტალიზაცია დაასახელა. ამჟამად, DOGE უმსხვილესი კრიპტოვალუტების ათეულში შედის და მისი ფასი 0.12 დოლარს შეადგენს. ჟაო სხვა მემკოინების მიმართ ნაკლებად ოპტიმისტურად არის განწყობილი – მას მიაჩნია, რომ მემკოინების უმეტესობა DOGE-ს მსგავსად კრიპტო ბაზარზე ხანგრძლივი დროით შენარჩუნებას ვერ შეძლებს.

ჟაომ ცოტა ხნის წინ გამომწერებს მოუწოდა მისი ხუმრობების საფუძველზე შექმნილი მემკოინები არ შეეძინათ.

Binance-ის დამფუძნებელმა კმაყოფილება გამოთქვა იმის გამო, რომ ბოლო დროს, ადამიანები გადახდებს სულ უფრო ხშირად ახორციელებენ კრიპტოვალუტის ბარათებით – რა დროსაც ციფრული აქტივები ფიატურ ვალუტად გარდაიქმნება და ტრეიდერები ჩვეულებრივ ვალუტას იღებენ, იქნება ეს დოლარი თუ ევრო. თუმცა, აქვე დანანებით აღნიშნა, რომ ბიტკოინმა და სხვა ციფრულმა აქტივებმა ყოველდღიურ გადახდებში ფართო გამოყენებას ჯერ კიდევ ვერ მიაღწია.

მისი აზრით, სხვადასხვა იურისდიქციაში კრიპტო კომპანიების მიმართ არსებული განსხვავებული მოთხოვნები კრიპტოვალუტებისთვის ერთიანი საერთაშორისო სამართლებრივი ჩარჩოს შექმნას ართულებს. ამ პრობლემის გადასაჭრელად ჟაომ „მარეგულირებელი პასპორტების“ სისტემის შემოღება დაასახელა, რომლის მეშვეობითაც ერთ ქვეყანაში კრიპტო კომპანიებისთვის გაცემული ლიცენზიები სხვა სახელმწიფოების მიერ იქნება აღიარებული. მისი აზრით, ეს უფრო ეფექტური იქნება, ვიდრე ერთიანი, ცენტრალიზებული საერთაშორისო მარეგულირებელი ორგანოს შექმნა.

წყარო: https://x.com/WuBlockchain/status/2015761639442669638