ბიტკოინი საფრთხეა ფინანსური ბაზრისთვის

ბიტკოინი საფრთხეა ფინანსური ბაზრისთვის

 ინგლისის ბანკის ხელმძღვანელის მოადგილემ, ჯონ კანლიფმა ბიტკოინს ფინანსური სტაბილურობისთვის სტეიბლკოინებთან შედარებით გაცილებით დიდი საფრთხე უწოდა და ცენტრალური ბანკების ციფრული ვალუტების მიმართ საკუთარი მხარდაჭერა გამოხატა.

გამომცემლობა Financial News-ის თანახმად, ჯონ კანლიფის (Jon Cunliff) განცხადებით, 

ყველა არსებული კრიპტოვალუტიდან გლობალური ფინანსური სისტემაისთვის ყველაზე დიდ რისკს ბიტკოინი წარმოადგენს.

მისი განმარტებით, მოცემულ მომენტში ციფრული აქტივები არ წარმოადგენენ საფრთხეს ფინანსური ბაზრისთვის.

მაგრამ, ისინი სწრაფი ტემპით ვითარდებიან და მათი დანერგვა სხვადასხვა სფეროში ხდება, ამიტომ მათ მაღალ ვოლატილობას გავლენის მოხდენა ტრადიციულ ფინანსურ ბაზარზეც შეუძლია.

„კრიპტოვალუტები ახლოსაა იმ მომენტთან, როდესაც მათ ფინანსური სამყაროსთვის სერიოზული საფრთხის შექმნა შეუძლიათ.

მარეგულირებლებმა და კანონმდებლებმა ამაზე კარგად უნდა იფიქრონ და კრიპტოაქტივების რეგულირებაში სიცხადე შეიტანონ“- თქვა კანლიფმა.

მას მიაჩნია, რომ ჩვეულებრივი კრიპტოვალუტებისგან განსხვავებით, სტეიბლკოინები ნაკლებ საფრთხეს წარმოადგენენ, რადგან ისინი  ფიატიურ ვალუტებთან ან ფიზიკურ საქონელთან (როგორიცაა ოქრო ან ნავთობი) არიან მიბმული, რაც მათ არასტაბილურობას ზღუდავს.

თუმცა, კანლიფის აზრით, მარეგულირებელთა მოთხოვნებთან სრულ შეუსაბამობაში სტაბილური კრიპტოვალუტებიც შეიძლება იყვნენ.

მან მაგალითად მოიყვანა სტეიბლკოინი  Diem, რომელზეც სოციალური გიგანტი Meta (ყოფილი Facebook) მუშაობს.

ამასთან,  კანლიფი დარწმუნებულია, რომ ცენტრალური ბანკის ციფრულ ვალუტებს დიდი პოტენციალი აქვთ.

ინგლისის ბანკი აქტიურად იკვლევს ციფრული ფუნტი სტერლინგის დანერგვის შესაძლებლობას, რადგან თანამედროვე მსოფლიოში ტრანზაქციების განხორციელების მეთოდები იცვლება და ციფრულ ფორმატში გადადის.

„ბაზარზე ახალი მოთამაშეები შემოდიან, რომელთა შორის დიდი ტექნოლოგიური პლატფორმები და სოციალური პლატფორმები არიან. ისინი არ წარმოადგენენ  ბანკებს, მაგრამ საკუთარი „ფულის“ გამოშვებას აპირებენ. თუმცა,  მათ შეთავაზებებს  ფართომასშტაბიანი არ შეიძლება ეწოდოს, ამიტომ ცენტრალური ბანკები მათ არ ჩამორჩებიან და სახელმწიფო სტეიბლკოინების შესაქმნელად ბევრს მუშაობენ. “- აღნიშნა კანლიფმა.

მომავალ წელს ინგლისის ბანკი და დიდი ბრიტანეთის ფინანსთა სამინისტრო ციფრული ფუნტის შესაძლებლობებთან დაკავშირებით საჯარო დისკუსიებს გამართავენ, იმისთვის რათა ნახონ, აქვს თუ არა აზრი მის ამოქმედებას ორგანიზაციებისა და კერძო პირებისთვის.

წყარო: https://bits.media