by shaksen 
Bitcoin-ის ერთ-ერთმა უმსხვილესმა მაინერმა, სინგაპურულმა Bitdeer-მა, საკუთარი ბიტკოინის სრული მარაგი გაასხვისა. ამის შესახებ კომპანიის უახლესი ფინანსური ანგარიში მიუთითებს.
ბოლო კვირაში კომპანიამ მოიპოვა 189.8 BTC და მთელი მოცულობა გაყიდა. დამატებით, Bitdeer-მა რეზერვებიდანაც გაასხვისა 943.1 BTC.
კომპანიას არ დაუკონკრეტებია, რა გახდა ასეთი გადაწყვეტილების მიზეზი.
შედარებისთვის, 13 თებერვლის ანგარიშში მითითებული იყო, რომ მაინერმა გაყიდა მხოლოდ 179.9 BTC იმ 183.4 BTC-დან, რაც კვირაში მოიპოვა. მაშინ რეზერვები ხელუხლებელი დარჩა.
როგორც წესი, მაინერები მხოლოდ ნაწილის გაყიდვას ახდენენ, რათა დაფარონ ელექტროენერგიის, ჰოსტინგისა და აღჭურვილობის ხარჯები.
მაინერების აქტივობა და ბაზრის ფონი
თებერვალში, კრიპტოვალუტების ფასების ვარდნის ფონზე, მაინერებმა ბირჟებიდან ჯამში 36 000 BTC გამოიტანეს.
ანალიტიკური პლატფორმის CryptoQuant მონაცემებით, მხოლოდ Binance-დან 12 000-ზე მეტი BTC გავიდა.
ამავე პერიოდში Bitdeer-ის აქციები 23%-ით დაეცა და $7.78-მდე ჩამოვიდა. კოტირების შემცირება დაემთხვა კომპანიის განცხადებას, რომ ის გეგმავს 300 მილიონი დოლარის მოზიდვას 2032 წლამდე კონვერტირებადი ობლიგაციების გამოშვებით. დამატებით, გამოშვების მოცულობა შესაძლოა კიდევ 45 მილიონი დოლარით გაიზარდოს.
მომავალში ობლიგაციები შეიძლება კონვერტირდეს კომპანიის აქციებში, ნაღდ ფულად ან მათი კომბინაციით. მიღებული თანხა მიმართული იქნება მონაცემთა ცენტრების გაფართოებაზე, ხელოვნური ინტელექტის ღრუბლოვანი სერვისების განვითარებაზე, მაინინგ მოწყობილობების წარმოებაზე და სხვა კორპორატიულ საჭიროებებზე.
Bitdeer — ჰეშრეიტის ახალი ლიდერი?
მანამდე Bitdeer აცხადებდა, რომ გამოთვლითი სიმძლავრით მსოფლიოში უმსხვილესი ბიტკოინის მაინერი გახდა და ბაზრის ლიდერს, MARA Holdings-ს გადაასწრო.
კომპანიის ცნობით, მისი ფერმების საერთო სიმძლავრე 71 ექზაჰეშს წამში (EH/s) აღწევს. ეს ბიტკოინის გლობალური ჰეშრეიტის დაახლოებით 6%-ს შეადგენს.
Bitdeer ასევე აღნიშნავს, რომ სულ უფრო მეტი სიმძლავრე აღარ ქირავდება და უშუალოდ კომპანიის საჭიროებებს ხმარდება.
