by Giorgi 
კრიპტობირჟა BitMEX ფუნქციონირებას წყვეტს
ბიზნესმენ არტურ ჰეისის (Arthur Hayes) მიერ 11 წლის წინ დაარსებულმა კრიპტო ბირჟამ BitMEX საქმიანობის შეწყვეტის შესახებ გამოაცხადა. ახალი მომხმარებლების რეგისტრაცია უკვე შეჩერებულია.
BitMEX-ის მფლობელისა და ოპერატორის, HDR Global Trading-ის დირექტორთა საბჭოს მხრიდან ეს გადაწყვეტილება „კომპანიის ოპერაციებისა და კრიპტო ინდუსტრიაში არსებული სიტუაციის სტრატეგიული მიმოხილვის შემდეგ“ იქნა მიღებული.
26 აგვისტოდან ტრეიდერებს მხოლოდ ღია პოზიციების შემცირება შეეძლებათ; 23 სექტემბრისთვის ყველა დარჩენილი პოზიცია იძულებით დაიხურება. ბირჟა მომხმარებლებს აქტივების დროულად გატანას ურჩევს. განცხადების თანახმად, ვაჭრობის დასრულების შემდეგ, ანგარიშზე წვდომა მხოლოდ ბალანსისა და ტრანზაქციების ისტორიის სანახავად, ასევე თანხის გატანისთვის იქნება შესაძლებელი.
მომხმარებლებს, რომლებიც თანხების სხვა პლატფორმაზე გადარიცხვას მოცემულ ვადებში ვერ შეძლებენ, თითო ტრანზაქციაზე 50 აშშ დოლარის საკომისიო ან ანგარიშის ბალანსის წლიური 1% დაეკისრებათ. ბირჟამ მომხმარებლები ქსელის მაღალი დატვირთვის გამო ტრანზაქციების შესაძლო შეფერხების შესახებ გააფრთხილა. საგანგებოდ აღინიშნა, რომ არ არსებობს არანაირი დაჩქარებული გატანის სერვისი და რომ ასეთი სერვისის შემოთავაზების შემთხვევაში საქმე თაღლითობას ეხება.
BitMEX 2014 წელს დაარსდა. 2016 წელს კომპანიამ კონტრაქტი XBTUSD აამოქმედა – პირველი ფართოდ მოთხოვნადი მუდმივი კრიპტოვალუტის ფიუჩერსული კონტრაქტი 100-ჯერადი ბერკეტით. ბირჟის მონაცემებით, XBTUSD-ის მთლიანმა სავაჭრო მოცულობამ 3 ტრილიონ დოლარს გადააჭარბა.
კრიპტო ინდუსტრიაში მოხვედრამდე, არტურ ჰეისი Deutsche Bank-სა და Citigroup-ში დერივატივებით ვაჭრობას ეწეოდა. მან BitMEX 2020 წელს აშშ-ს ხელისუფლების მხრიდან ფულის გათეთრების საწინააღმდეგო და მომხმარებლის იდენტიფიკაციის ადეკვატური სისტემების არარსებობასთან დაკავშირებული ბრალდებების ფონზე დატოვა. 2022 წელს ჰეისმა თავი დამნაშავედ ცნო. მას შინაპატიმრობა მიუსაჯეს და 10 მილიონი დოლარის ჯარიმა დააკისრეს. 2025 წელს ბიზნესმენმა აშშ-ს პრეზიდენტ დონალდ ტრამპისგან შეწყალება მიიღო. ჰეისი ამჟამად აქტიური ინვესტორის როლში გვევლინება. ცოტა ხნის წინ მან 2.2 მილიონ დოლარად პროექტ Synapse-ის 6.16 მილიონი SYN-ის შეძენის შესახებ გამოაცხადა.
წყარო: https://www.bitmex.com/blog/bitmex-closure
სიახლეების გამოწერა
