BlockFi-იმ გაკოტრების შესახებ განაცხადა
კრიპტოვალუტის კრედიტორმა BlockFi გაკოტრების შესახებ განცხადება შეიტანა და ბირჟა FTX-ის კრახის შედეგად გამოწვეული აფტერშოკის კიდევ ერთი მსხვერპლი გახდა.
ორშაბათს, BlockFi-მ და მისმა რვა შვილობილმა კომპანიამ ნიუ ჯერსის საოლქო სასამართლოში გაკოტრების შესახებ განცხადება შეიტანეს. BlockFi-ს განცხადებით, სასამართლოსთვის მიმართვა კომპანიების ჯგუფს მიმდინარე პროცესების სტაბილიზირებისა და ბიზნესის რესტრუქტურიზაციის შესაძლებლობას მისცემს.
ნიუ ჯერსიში დაფუძნებულმა კომპანიამ ივლისში FTX-ისგან დაახლოებით 400 მილიონი დოლარის ოდენობის ფინანსური მხარდაჭერა მიიღო. გარდა ამისა, FTX BlockFi-ს ყიდვას 680 მილიონ დოლარად გეგმავდა. თუმცა, ნოემბრის პირველ ნახევარში FTX-ის კრახის ფონზე, კრიპტო კრედიტორმა თანხების გამოტანის ოპერაციები შეაჩერა.
BlockFi-ს რესტრუქტურიზაციასთან დაკავშირებული ზომები პერსონალის ნაწილის დათხოვნას ითვალისწინებს, თუმცა, ჯერჯერობით უცნობია რამდენი თანამშრომლის გათავისუფლება იგეგმება. კომპანიის განცხადებით მათ „ხარჯების, მათ შორის შრომის ხარჯების შემცირების შიდა გეგმა შეიმუშავეს“. მაგრამ ამავდროულად, სასამართლოს შუამდგომლობას მიმართეს, რაც საქმიანობის გასაგრძელებლად ძირითდი პერსონალის შენარჩუნების შესაძლებლობას მისცემთ.
BlockFi-ის განმარტებით, მას დაახლოებით 257 მილიონი დოლარი აქვს, რამაც რესტრუქტურიზაციის პროცესში გარკვეული ოპერაციების მხარდასაჭერად ლიკვიდობა უნდა უზრუნველყოს.
ინფორმაცია, რომ BlockFi გაკოტრებისთვის ემზადება თავდაპირველად Wall Street Journal-მა გაავრცელა.
- გამოგვეყვით ტელეგრამზე t.me/cryptonewsgeorgia
- დაემატეთ ჩვენს ჯგუფში Fb.me/groups/cryptonewsgeorgia
Comments (No)