by Maria 
Chainalysis-ის ანალიტიკოსებმა თურქეთის კრიპტო ბაზრის ზრდის მიზეზი გამოავლინეს
თურქეთში კრიპტოვალუტით ტრანზაქციების წლიურმა მოცულობამ 200 მილიარდ დოლარს გადააჭარბა. კომპანია Chainalysis-ის ექსპერტების აზრით, ინფლაციის დასაძლევად ალტკოინებით სპეკულაციური ვაჭრობა ქვეყნის კრიპტო ბაზრის ზრდას უწყობს ხელს.
თურქეთში წლიური ინფლაცია 33%-ია. Chainalysis-ის მიერ ჩატარებული კვლევის ავტორების თქმით, ციფრული აქტივები ჰეჯირების ინსტრუმენტად იქცევა და პროდუქტებისა და მომსახურების საფასურის გადახდებისთვის ან საზღვრისპირა გადარიცხვებისთვის ნაკლებად გამოიყენება.
შედარებისთვის, არაბთა გაერთიანებულ საემიროებში (UAE) პირიქით, კრიპტოვალუტების გამოყენება უფრო ხშირად გადახდებისა და გადარიცხვებისთვის ხდება. ანალიტიკოსების ცნობით, თურქეთში კრიპტო ინვესტორები ძირითადად მოკლევადიან ტრანზაქციებზე არიან ორიენტირებული.
Chainalysis-ის მონაცემებით, თურქეთის კრიპტო ბაზარზე ალტკოინების 31-დღიანი მოძრავი საშუალო ტექნიკური მაჩვენებელი 2024 წლის ბოლოს არსებული 50 მილიონი დოლარიდან 2025 წლის შუა პერიოდისთვის 240 მილიონ დოლარამდე გაიზარდა. ამასობაში, სტაბილური კრიპტოვალუტების ტრანზაქციების საერთო მოცულობა 200 მილიონი დოლარიდან 70 მილიონ დოლარამდე შემცირდა.
Chainalysis-ის ექსპერტები თურქი ინვესტორების მხრიდან სარისკო ტოკენებისადმი ინტერესის ზრდას ეკონომიკურ ზეწოლასა და შემოსავლიანობის სასოწარკვეთილ ძიებას უკავშირებენ.
„ალტკოინების პოპულარობის ზრდის დრო რეგიონში არსებულ მნიშვნელოვან ეკონომიკურ სირთულეებს ემთხვევა.“- განაცხადეს კვლევის ავტორებმა.
Chainalysis-ის წარმომადგენლების განცხადებით, მსხვილი თურქი ინვესტორები თავიანთ აქტივობას ზრდიან ხოლო საცალო ინვესტორები პირიქით, ნაკლებად ხილულები ხდებიან. ეს იმაზე მიუთითებს, რომ თურქული კომპანიები სავალუტო რისკებისგან თავის დაცვას ცდილობენ, ხოლო საცალო ინვესტორებს მონაწილეობის შეზღუდული შესაძლებლობები აქვთ.
წყარო: https://www.chainalysis.com/blog/middle-east-north-africa-crypto-adoption-2025/
სიახლეების გამოწერა
