Chase და Siemens გადახდის პლატფორმას შექმნიან

Chase და Siemens  გადახდის პლატფორმას შექმნიან

ამერიკული ბანკი JPMorgan Chase, გერმანულ ტექნოლოგიურ გიგანტ Siemens-თან ერთად, გადახდების განხორციელების ბლოკჩეინზე დაფუძნებულ სისტემას ავითარებს. 

Siemens-ის გადახდების განყოფილების ხელმძღვანელის ჰეიკო ნიქსის (Heiko Nix) თქმით, ბლოკჩეინის ტექნოლოგია მონაცემთა გამჭვირვალობას და უცვლელობას , ასევე ტრანზაქციების ავტომატიზირებას უზრუნველყოფს.

ეს ტრანზაქციების მეტი რაოდენობის უფრო სწრაფად დამუშავების საშუალებას იძლევა. სისტემა ამჟამად Siemens-ის ანგარიშებს შორის აშშ დოლარის ავტომატურად გადარიცხვისთვის გამოიყენება. მომავალ წელს კი ევროს ტრანსფერების დამატება იგეგმება.

Siemens-სა და JPMorgan Chase-ს ახალი პლატფორმის მეშვეობით განხორციელებული გადახდების მოცულობის შესახებ ინფორმაცია არ გაუსაჯაროვებიათ.

„ბიზნესი  ერთ ადგილას არ ჩერდება და ციფრული ბიზნეს მოდელების გაჩენასთან დაკავშირებით მნიშვნელოვან ცვლილებებს განიცდის. ამიტომ, გაუმჯობესება გადახდებსაც უნდა შეეხოს. ბლოკჩეინი მათ ავტომატიზაციას დაეხმარება, შეამცირებს ხარჯებს და ფულადი სახსრების განაწილებას გაამარტივებს.“ – თქვა ნიქსმა.

JPMorgan-ის ბლოკჩეინის განვითარების განყოფილების, Onyx-ის აღმასრულებელი დირექტორი ნავინ მალელა (Naveen Mallela) მიიჩნევს,

რომ შექმნილ ინფრასტრუქტურას გადახდები ტრადიციული ჩარჩოს ფარგლებს მიღმა გადააქვს. მალელას თქმით, ბლოკჩეინი უფრო მოქნილი წესების დანერგვის საშუალებას იძლევა მაშინ, როცა არსებული ინფრასტრუქტურა არაქმედითუნარიანია.

JPMorgan-ს უკვე ჰყავს რამდენიმე კლიენტი, რომელთა მოწვევაც ბანკს ახალი სისტემის ტესტირებისთვის სურს და Siemens წამყვანი კლიენტის რანგში მათ შორისაა.

Siemens ბლოკჩეინის შესაძლებლობებს უკვე რამდენიმე წელია იკვლევს. ჯერ კიდევ 2018 წელს კომპანია Energy Web Foundation-ს (EWF) შეუერთდა.

ეს არის საერთაშორისო ორგანიზაცია, რომელიც მხარს უჭერს ბლოკჩეინის განვითარებას ენერგეტიკულ სექტორში. 2019 წელს Siemens-მა ახალი ტექნოლოგიების ფასიანი ქაღალდების ბაზარზე გამოყენებისთვის პარტნიორობა Commerzbank-თან დაიწყო. JPMorgan-ის გარდა, ბლოკჩეინში დიდ პოტენციალს სხვა ბანკებიც ხედავენ . გასულ კვირას Wells Fargo-მ და HSBC-მ ბლოკჩეინის გამოყენება საერთაშორისო გადახდების მოსაგვარებლად დაიწყეს.

 

წყარო: https://bits.media/