Coin Center აშშ-ში სტეიბლკოინების შესახებ ახალი კანონის წინააღმდეგ გამოვიდა

Coin Center აშშ-ში სტეიბლკოინების შესახებ ახალი კანონის წინააღმდეგ გამოვიდა

ორგანიზაციამ Coin Center, რომელიც კრიპტო ბაზრის ინტერესებს ლობირებს, სტეიბლკოინების შესახებ განახლებული კანონპროექტი გააკრიტიკა და განაცხადა, რომ ის აშშ-ს კონსტიტუციის სიტყვის თავისუფლების დებულებებს არღვევს.

Coin Center-ის წარმომადგენლების აზრით, თუ კანონპროექტს მისი ახლანდელი ვერსიით მიიღებენ, ფედერალური ხელისუფლება სტეიბლკოინების სექტორის დასარეგულირებლად დამატებით უფლებამოსილებებს მიიღებს, რაც შეერთებულ შტატებში კრიპტო ბაზრის შემდგომ განვითარებას შეზღუდავს.

„შესაძლოა, Terra-ს მსგავსი ემიტენტებისაგან SEC-ში რეგისტრაციის მოთხოვნა და შესაბამისი ინფორმაციის გასაჯაროება გონივრული იყოს, მაგრამ კონკრეტული ბიზნეს მოდელის პირდაპირი აკრძალვა უსარგებლო და ანტიინოვაციურია.“

ორგანიზაციის მტკიცებით, კანონპროექტში შესული არაუზრუნველყოფილი, ე.წ ალგორითმული სტეიბლკოინების აკრძალვა იგივე კოდის აკრძალვაა, რაც აშშ-ს კონსტიტუციით სიტყვის თავისუფლების გარანტიას უქმნის საფრთხეს.

Coin Center კანონპროექტის წინა ვერსიის დაბრუნების მომხრეა, რომელიც არაუზრუნველყოფილი აქტივების გაცემის არა სრულ აკრძალვას, არამედ ორწლიან მორატორიუმს ითვალისწინებს.

მანამდე, პარლამენტარების ჯგუფმა აშშ-ს კონგრესს წინადადებით მიმართა, გააუქმოს კანონის დებულება, რომელიც ფასიანი ქაღალდებისა და ბირჟების კომისიას (SEC) უფლებას აძლევს ბანკებს ბალანსში კლიენტების ციფრული აქტივების  შეტანა მოსთხოვოს.