by Giorgi 
Coinbase და OKX Binance-ის ევროპელი მომხმარებლების გადმობირებას ცდილობენ
Binance-ისთვის ევროკავშირის ტერიტორიაზე ოპერირების შეზღუდვის ფონზე, კრიპტოვალუტის ბირჟებმა Coinbase და OKX ევროპელი მომხმარებლებისთვის ბონუსების შეთავაზება დაიწყეს.
Coinbase-ის აღმასრულებელმა დირექტორმა ბრაიან არმსტრონგმა (Brian Armstrong) სოციალურ მედიაში გერმანიის, საფრანგეთის, იტალიის, ბელგიის, პოლონეთის, შვედეთისა და დიდი ბრიტანეთის მომხმარებლებს ბირჟაზე რეგისტრაციისთვის ბონუსებს დაპირდა. ბონუსი 13 ივლისამდე Coinbase-ის ანგარიშზე შეტანილი თანხის 5%-ს შეადგენს. არმსტრონგმა მომხმარებლებს შეახსენა, რომ კომპანია ევროპული კრიპტო მარეგულირებელი სტანდარტების შესაბამისად არის ლიცენზირებული.
ევროპელებისთვის ბონუსების შესახებ OKX-ის დამფუძნებელმა სტარ სიუმაც (Star Xu) გამოაცხადა. OKX-ის ახალი მომხმარებლებისთვის შეთავაზებული ჯილდო და დეპოზიტის ბონუსები 8%-მდეა.
ბოლო დღეებში დაგზავნილ საინფორმაციო შეტყობინებებში Binance-მა თავის ევროპელ მომხმარებლებს მომსახურების შეზღუდვებისა და ახალი ანგარიშების რეგისტრაციის შეწყვეტის შესახებ აცნობა. პლატფორმას ლიცენზიის მიღებაზე უარი ჯერ საბერძნეთმა, შემდეგ კი ევროკავშირის კიდევ რამდენიმე ქვეყანამ განუცხადა. პლატფორმამ ლიცენზიის მისაღებად ამჟამად საფრანგეთს მიმართა.
ევროკავშირის ახალი კანონმდებლობის თანახმად, 27 წევრ სახელმწიფოში მომსახურების გასაწევად კრიპტო კომპანიებმა MiCA ლიცენზია სულ მცირე ერთ ქვეყანაში ა.წ პირველ ივლისამდე უნდა მიიღონ. არალიცენზირებული კომპანიები ვალდებულნი არიან შეწყვიტონ საქმიანობა.
ცოტა ხნით ადრე, ევროპის ცენტრალურმა ბანკმა (ECB) დაამტკიცა ევროკომისიის წინადადება კრიპტო ბირჟებისა და ვირტუალური აქტივების მომსახურების მიმწოდებლების (VASP) ზედამხედველობის ევროპის ფასიანი ქაღალდებისა და ბაზრების ორგანოსთვის (ESMA) გადაცემის შესახებ, რაც ევროკავშირის ქვეყნებში ეროვნულ მარეგულირებლებს ჩაანაცვლებს.
სიახლეების გამოწერა
