Coinbase-მა გამომძალველებს გამოსასყიდზე უარი განუცხადა

Coinbase-მა გამომძალველებს გამოსასყიდზე უარი განუცხადა

კრიპტო ბირჟა Coinbase-ის აღმასრულებელი დირექტორის ბრაიან არმსტრონგის (Brian Armstrong) განცხადებით, კიბერკრიმინალები მომხმარებელთა მონაცემების გაუმჟღავნების სანაცვლოდ ბირჟიდან 20 მილიონი დოლარის ბიტკოინის გამოძალვას ცდილობდნენ. ბირჟამ დამნაშავეებისთვის თანხის გადახდაზე უარი განაცხადა.

არმსტრონგის თქმით, თაღლითებმა Coinbase-ის მომხმარებლებისგან პირადი ინფორმაცია მოიპოვეს, მათ შორის პირადობის დამადასტურებელი დოკუმენტების ასლები, ტრანზაქციების ისტორია, ინფორმაცია საბანკო ანგარიშებზე და სოციალური დაზღვევის ნომრები.

არმსტრონგის თქმით, კიბერდამნაშავეებმა მონაცემები მომხმარებელთა მომსახურების უცხოელი აგენტების მოსყიდვის შედეგად მოიპოვეს.

აღმასრულებელი დირექტორი ირწმუნება, რომ კიბერ შეტევა Coinbase-ის რეგულარული მომხმარებლების 1%-ზე ნაკლებს შეეხო. მისი თქმით, ბოროტმოქმედებმა ანგარიშებით სარგებლობისთვის პირადი გასაღებებისა და პაროლების მოპოვება ვერ შეძლეს.

არმსტრონგის განმარტებით, მომხმარებლების ანგარიშებსა და საფულეებზე წვდომა არ შეფერხებულა და მომხდარს Coinbase Prime ანგარიშებზე გავლენა არ მოუხდენია.

უცნობი პირები მოპოვებული მონაცემების გასაჯაროებით იმუქრებოდნენ, რომელთა გამოყენება ნებისმიერ თაღლითს კრიპტოაქტივების მოსაპარად შეეძლო.

„გამომძალველების მიზანი იმ მომხმარებლების სიის შედგენა იყო, რომლებთანაც დაკავშირება Coinbase-ის სახელით იქნებოდა შესაძლებელი. მათ ჩვენთვის 20 მილიონი დოლარის გამოძალვა სცადეს, მაგრამ ჩვენ უარი ვუთხარით.“ – თქვა ბრაიან არმსტრონგმა.

Coinbase-მა ინციდენტის შესახებ სამართალდამცავ ორგანოებს აცნობა. ბირჟამ ასევე ჰაკერული თავდასხმის შესახებ ანგარიში აშშ-ის ფასიანი ქაღალდებისა და ბირჟების კომისიას (SEC) წარუდგინა.

Coinbase-ის შეფასებით, გამოძიების ხარჯები, მოტყუებული მომხმარებლებისთვის ზარალის კომპენსაცია და უსაფრთხოების გაზრდა შესაძლოა კომპანიას 180 მილიონიდან 400 მილიონ დოლარამდე დაუჯდეს.

Coinbase მზადაა, უცნობი პირების მიერ მოთხოვნილი 20 მილიონი დოლარი გადაუხადოს ნებისმიერ პირს, რომელიც კრიპტო ბირჟას დამნაშავეების იდენტიფიცირებაში დაეხმარება.