Coinbase-ზე ბიტკოინის ტრანზაქციების 15% Lightning Network-ის მეშვეობით ხორციელდება

Coinbase-ზე ბიტკოინის ტრანზაქციების 15% Lightning Network-ის მეშვეობით ხორციელდება

ამერიკული კრიპტოვალუტის ბირჟა Coinbase-ის განცხადებით, მისი ბიტკოინის ტრანზაქციების 15% მეორე დონის ქსელის – Lightning Network-ის მეშვეობით ხორციელდება, რომელიც მყისიერი და ეკონომიური ტრანზაქციების განსახორციელებლად შეიქმნა.

Coinbase-მა Lightning Network-ის ინტეგრირება 2024 წლის აპრილში მოახდინა, რათა BTC ტრანზაქციები უფრო მარტივი და სწრაფი ყოფილიყო. ამისათვის ბირჟამ პარტნიორობის ხელშეკრულება გააფორმა სერვის Lightspark-თან, რომელსაც PayPal-ის ყოფილი პრეზიდენტი დევიდ მარკუსი ხელმძღვანელობს.
Coinbase-ის პროდუქტის განვითარების დირექტორმა, მაიკლ რიჰანიმ (Michael Rihani) აღნიშნა, რომ ერთი წლის შემდეგ, ასეთი ტრანზაქციების პროცენტულმა მაჩვენებელმა Lightning Network-ის რეალური სარგებელი აჩვენა – ბიტკოინი საერთაშორისო გადახდების განხორციელების ეფექტურ ინსტრუმენტად იქცა.

პირველი კრიპტოვალუტით ტრანზაქციების გაუმჯობესების გარდა, Coinbase Asset Management 1 მაისს ინსტიტუციური ფონდის, Coinbase Bitcoin Yield Fund-ის (CBYF) ამოქმედებას გეგმავს. ფონდი იმ საერთაშორისო იურიდიული პირებისთვის იქნება განკუთვნილი, რომლებსაც ბიტკოინისგან მოგების მიღების შესაძლებლობა  ექნებთ. ფონდმა აბუ-დაბის მიერ რეგულირებადი Aspen Digital-ისგან ინვესტიცია უკვე მიიღო.

ცოტა ხნის წინ, Tether-ის აღმასრულებელმა დირექტორმა პაოლო არდოინომ (Paolo Ardoino) პირობა დადო, რომ სტეიბლკოინი USDT მალე ხელმისაწვდომი Lightning Network-ზეც იქნება. მისი აზრით, ეს სტეიბლკოინებით დიდი ტრანზაქციების განსახორციელებლად საუკეთესო შესაძლებლობაა.

გასულ წელს ამერიკულმა კრიპტო ბირჟამ Kraken ზოგიერთი მომხმარებლისთვის Lightning Network-ის მეშვეობით ბიტკოინის გატანა დაბლოკა. ბირჟის მენეჯმენტმა ეს გერმანიიდან მომხმარებლებისთვის მომსახურების ახალი პირობებით და გერმანიის ფედერალური ფინანსური ზედამხედველობის ორგანოს (BaFin) მოთხოვნების დაცვის სურვილით ახსნა.