by Giorgi 
Coinbase ინსაიდერულ ვაჭრობაში დაადანაშაულეს
აშშ-ის უმსხვილესი კრიპტო ბირჟის, Coinbase-ის რამდენიმე აქციონერმა კომპანიის მენეჯმენტი, მათ შორის აღმასრულებელი დირექტორი ბრაიან არმსტრონგი (Brian Armstrong) და საბჭოს წევრი მარკ ანდრეესენი (Marc Andreessen), აქციების გაყიდვის მანიპულირებაში დაადანაშაულა.
ნოემბრის ბოლოს დელავერის შტატის სასამართლოში Coinbase-ის უმაღლესი მენეჯმენტის წინააღმდეგ კოლექტიური სარჩელი შევიდა. მოსარჩელეების განცხადებით, არმსტრონგმა და ანდრეესენმა ინვესტორებისგან განზრახ დამალეს კომპანიის „Know Your Customer“ (KYC) ვერიფიკაციისა და ფულის გათეთრების საწინააღმდეგო (AML) სისტემებში არსებული ხარვეზები.
უკმაყოფილო აქციონერების განცხადებით, უმაღლესმა მენეჯმენტმა Coinbase-ის დაახლოებით 4.2 მილიარდი დოლარის ღირებულების აქციების გაბერილ ფასებში გაყიდვა შეცდომაში შემყვანი საჯარო განცხადებებისა და ასევე წლების მანძილზე KYC და AML სისტემური დარღვევების, მომხმარებელთა პერსონალური მონაცემების გაჟონვისა და მარეგულირებელი აუდიტის უარყოფითი შედეგების დამალვის მეშვეობით მოახერხა.
აქციონერები მრავალმილიარდიანი ზარალის ანაზღაურებას და კრიპტო ბირჟის კორპორატიული მმართველობის ცვლილებებს ითხოვენ.
ეს დელავერის სასამართლოში კრიპტო ბირჟის ტოპ მენეჯერების წინააღმდეგ ინსაიდერული ვაჭრობის ბრალდებით შეტანილი მეორე სარჩელია.
პირველი სარჩელი 2023 წლის აპრილში შეიტანეს. მაშინ აქციონერებმა სავაჭრო პლატფორმის მენეჯმენტი 2021 წლის 14 აპრილს Coinbase-ის აქციების Nasdaq-ის საფონდო ბირჟაზე განთავსებამდე მნიშვნელოვანი რისკების დამალვაში დაადანაშაულეს.
პირველი სარჩელის თანახმად, კრიპტო ბირჟის მენეჯმენტმა გაბერილ ფასებში 2.9 მილიარდი დოლარის ღირებულების აქციები გაყიდა, რამაც აქციონერებს 1.09 მილიარდი დოლარის ზარალი მიაყენა.
2025 წლის მაისში დელავერის სასამართლომ ინვესტორების ზოგიერთი სარჩელი დააკმაყოფილა, თუმცა საქმე ჯერ კიდევ მტკიცებულებების მომზადების ეტაპზეა.
წყარო: https://www.theblock.co/learn/297391/how-to-open-a-coinbase-account
სიახლეების გამოწერა
