Coinbase რუს მომხმარებლებს დაბლოკვის შესახებ აფრთხილებს

Coinbase რუსეთში დარეგისტრიერებულ მომხმარებლებს ანგარიშების დაბლოკვის შესახებ შეტყობინებებს უგზავნის.

ამერიკულმა სავაჭრო პლატფორმამ Coinbase იმ რუს მომხმარებლებს, რომლებსაც სავარაუდოდ სანქციები ეხება, გამაფრთხილებელი შეტყობინებები გაუგზავნა.

შეტყობინებებში ნათქვამია, რომ ზემოთხსენებულთა ანგარიშების ფუნქციონირება შესაძლოა  2022 წლის 31 მაისიდან შეჩერდეს. Coinbase მომხმარებლებს მითითებულ ვადამდე ანგარიშიდან თანხების გატანას ან ისეთი დოკუმენტების წარდგენას სთავაზობს, რომლებიც დაადასტურებენ, რომ მათზე ევროკავშირის სანქციები არ ვრცელდება.

წინააღმდეგ შემთხვევაში, 2022 წლის პირველი ივნისიდან, იმ მომხმარებლების ანგარიშები,  რომლებმაც Coinbase -ის შეტყობინება უგულებელყვეს ან დაბლოკვის გასაუქმებლად  საკმარისი მტკიცებულებები არ წარმოადგინეს, გაიყინება.

Coinbase-ის მთავარმა იურისტმა, პოლ გრევალმა(Paul Grewal), მოცემულ სიტუაციაზე კომენტარი საკუთარ Twitter-ზე გააკეთა :

„ევროკავშირის ბოლო სანქციების შედეგად, Coinbase-ს აღარ შეუძლია კრიპტო სერვისების მიწოდება იმ რუსი მომხმარებელებისთვის, რომელთა ანგარიშებიც ბირჟის ევროპულ განყოფილებებშია რეგისტრირებული ან რომლებიც  ევროკავშირის ტერიტორიაზე იმყოფებიან. თუ ისინი ევროკავშირის ახალ შეზღუდვებს ექვემდებარებიან , ჩვენ მათ კანონთან შესაბამისობაში Coinbase-დან თანხების ამოღებაში დავეხმარებით.“

გრევალმა აქვე დასძინა, რომ Coinbase გააგრძელებს სერვისების მიწოდებას იმ რუსი მომხმარებლებისთვის, რომლებიც ევროკავშირის სანქციებს არ ექვემდებარებიან.

შეგახსენებთ, რომ მარტში Coinbase-მა პლატფორმის აღმასრულებელი დირექტორის სანქციების მხარდამჭერი განცხადებების შემდეგ რუსეთში რეგისტრირებული მომხმარებლების 25000 მისამართი დაბლოკა.