Coinbase-ს კონფიდენციალურობის დარღვევისთვის უჩივიან

Coinbase-ს კონფიდენციალურობის დარღვევისთვის უჩივიან

კრიპტოვალუტის ბირჟა Coinbase-ის მომხმარებელმა პლატფორმა ბიომეტრიული მონაცემების კონფიდენციალურობის კანონების დარღვევაში დაადანაშაულა და ამტკიცებს, რომ ბირჟა  კლიენტების თითის ანაბეჭდებსა და ფოტოებს უკანონოდ ინახავს.

კალიფორნიის შტატის საოლქო სასამართლოში შეტანილი კოლექტიური სარჩელის თანახმად, KYC (Know Your Client) პროცედურის გავლისას ბირჟის მხრიდან კლიენტისთვის ფოტოების ატვირთვის მოთხოვნა ილინოისის შტატის ბიომეტრიული კონფიდენციალურობის შესახებ კანონის (BIPA) დარღვევას წარმოადგენს.

კანონის თანახმად, ინფორმაციის შეგროვების მიზნით Coinbase-მა მომხმარებლებისგან  ნებართვა უნდა მიიღოს და მიუთითოს, თუ რა არის ბიომეტრიული მონაცემების შეგროვების მიზანი, რამდენ ხანს მოხდება ამ მონაცემების შენახვა, როგორ იქნება ისინი გამოყენებული და გამოყენების შემდეგ მოხდება თუ არა Coinbase-ის მიერ მათი სამუდამოდ განადგურდება.

„Coinbase-ს არ გაუსაჯაროვებია პოლიტიკა, რომელიც მონაცემთა შენახვის გრაფიკსა და ბიომეტრიული ინფორმაციის შეუქცევადი განადგურებისთვის პრინციპებს ადგენს.“- ნათქვამია სარჩელში.

მომჩივანის განცხადებით, ანგარიშზე შესვლისას მომხმარებლის გადამოწმების მიზნით ბიომეტრიული ავთენტიფიკაცია, კერძოდ, თითის ანაბეჭდი და სახის სკანირება, Coinbase-ის მობილურ აპლიკაციაშიც გამოიყენება.

მომხმარებელი შიშობს, რომ ამ მონაცემების შეგროვება, შენახვა და შემდგომი გამოყენება მას სერიოზული რისკის ქვეშ აყენებს,

რადგან მონაცემთა ბაზის გატეხვის შემთხვევაში Coinbase  პერსონალური მონაცემების გაჟონვის თავიდან აცილებას ვერ შეძლებს.

მოსარჩელე Coinbase-სგან მომხმარებლების ბიომეტრიული მონაცემების განადგურებას მოითხოვს, რადგან ამ  ინფორმაციის შეგროვება მხოლოდ ანგარიშის გასახსნელად იყო გამიზნული.

გარდა ამისა, მომხმარებელი მოითხოვს 5000 აშშ დოლარის ოდენობის კომპენსაციას BIPA-ს განზრახ დარღვევის შემთხვევაში ან 1000 აშშ დოლარის კომპენსაციას,

თუ სასამართლო დაადგენს, რომ სავარაუდო დარღვევები არ იყო განზრახ ჩადენილი. ასევე  ადვოკატების საფასურისა და სასამართლო ხარჯების ანაზღაურებას.