Coinbase 430 მილიონის ზარალის შესახებ იტყობინება

Coinbase 430 მილიონის ზარალის შესახებ იტყობინება

კრიპტობირჟა Coinbase 2022 წლის პირველ კვარტალში  430 მილიონი დოლარის ზარალის შესახებ იტყობინება.

2022 წლის პირველი კვარტალი კრიპტოვალუტის ბირჟისთვის Coinbase წარუმატებელი გამოდგა. ამერიკული კომპანიის მთლიანი შემოსავალი მნიშვნელოვნად შემცირდა, ხოლო წმინდა ზარალმა 430 მილიონი დოლარი შეადგინა.

Coinbase-ის მენეჯმენტმა აქციონერებისადმი მიმართვაში განაცხადა, რომ 2022 წლის პირველ კვარტალში კომპანიის მთლიანმა შემოსავალმა 1,165 მილიარდი დოლარი შეადგინა,

ხოლო წმინდა ზარალმა 430 მილიონი. შედარებისთვის, 2021 წლის მეოთხე კვარტალში, შესაბამისმა  მაჩვენებლებმა 2,49 მილიარდი და 840 მილიონი დოლარი შეადგინეს.

„2022 წლის პირველი კვარტალი აგრძელებს კრიპტოვალუტის ბაზრის კლებისა და არასტაბილურობის ტენდენციას, რომელიც 2021 წლის ბოლოს დაიწყო. მოცემულმა საბაზრო პირობებმა პირველ კვარტალში   ჩვენს ფინანსურ შედეგებზე პირდაპირ იმოქმედა. თუმცა, ჩვენ ასეთი საბაზრო პირობებისთვის მზად ვიყავით და კრიპტოვალუტის ინდუსტრიის მომავალს კვლავაც ენთუზიაზმით ვუყურებთ.“- ნათქვამია წერილში.

მნიშვნელოვნად შემცირდა მთლიანი სავაჭრო მოცულობაც და 2022 წლის პირველ კვარტალში 309 მილიარდი დოლარი შეადგინა, წინა კვარტალის 547 მილიარდ დოლართან შედარებით. 9,2 მილიონამდე შემცირდა მომხმარებელთა რაოდენობაც, რომლებმაც Coinbase პლატფორმაზე მინიმუმ ერთი სავაჭრო გარიგება განახორციელეს, ხოლო ბირჟის საფულეებზე აქტივების მთლიანი მოცულობა 256 მილიარდ დოლარამდე დაეცა.

Coinbase-ის მენეჯმენტი ხაზს უსვამს, რომ ასეთი საბაზრო პირობები სამუდამოდ არ გაგრძელდება და კომპანია „მომავალზეა ორიენტირებული“. Coinbase მისი კრიპტოვალუტის საფულისა და NFT-ებთან დაკავშირებული სერვისების განვითარებაში ინვესტირების გაგრძელებას გეგმავს.

ცოტა ხნის წინ გავრცელდა ინფორმაცია, რომ ბირჟის საფულეებში ბიტკოინების რაოდენობა ორ წელიწადში 36%-ით შემცირდა. ახლა ეს მაჩვენებელი 649,500 BTC-ს შეადგენს.