Crypto.com-მა თანამშრომლების თითქმის ნახევარი გაათავისუფლა

Crypto.com-მა თანამშრომლების თითქმის ნახევარი გაათავისუფლა

კრიპტოვალუტის ბაზრის დაცემამ თანამშრომლების შემცირება ბევრ კომპანიას აიძულა.

მედიის ცნობით, კრიპტოვალუტის ბირჟამ Crypto.com  2000-ზე მეტი ადამიანი გაათავისუფლა, რაც კომპანიაში დასაქმებულთა საერთო რაოდენობის დაახლოებით 40%-ს შეადგენს.

Crypto.com-ზე შემცირების შესახებ ცნობილი  მიმდინარე წლის ივნისში გახდა, მაშინ ბირჟა 260 ადამიანის – პერსონალის დაახლოებით 5%-ის გათავისუფლებას გეგმავდა.

გამოცემა Ad Age-ის ცნობით, საიტის ხელმძღვანელობამ მოგვიანებით არაუმეტეს 1000 თანამშრომლის  შემცირებაზე ისაუბრა.

თუმცა, ფაქტობრივად, კომპანიამ  2000-ზე მეტი ადამიანი – დასაქმებულთა საერთო რაოდენობის დაახლოებით 40% გაათავისუფლა.

გამოცემის ცნობით, პირველად შემცირებაში  მარკეტინგის დეპარტამენტების თანამშრომლები მოყვნენ. შემოქმედებითი განყოფილება დაარსებიდან რამდენიმე თვის შემდეგ მთლიანად დაიშალა.

„როგორც ივნისში მოგახსენეთ, Crypto.com რესტრუქტურიზაციის პროცესს გადის , რამაც მაკრო პირობებით გამოწვეული დათვის ბაზრის ციკლის განმავლობაში პოზიციების გამყარების საშუალება მოგვცა. რთული გადაწყვეტილება იყო. გათავისუფლებული თანამშრომლების 60% შტატგარეშე იყო ან  ბექოფისში და მომხმარებელთა მხარდაჭერის სერვისში იყო დასაქმებული. მათი რაოდენობა ვაჭრობის მოცულობაზეა დამოკიდებული.“ – განუცხადა გამოცემას პლატფორმის წარმომადგენელმა.

უნდა აღინიშნოს, რომ ახლა კრიპტოვალუტის კომპანიები ხარჯების შემცირებას მაქსიმალურად ცდილობენ. მაგალითად, თუ იანვარში Crypto.com-მა რეკლამაზე 40 მილიონი დოლარი დახარჯა,  მაისისთვის ხარჯები 2.1 მილიონ დოლარამდე შემცირდა.