CZ-მ გლობალური საფონდო ბაზრის ბლოკჩეინზე გადატანის წინადადება წამოაყენა
by Giorgi 
CZ-მ გლობალური საფონდო ბაზრის ბლოკჩეინზე გადატანის წინადადება წამოაყენა
ვაჭრობის მოცულობით მსოფლიოში უდიდესი კრიპტო ბირჟა Binance-ის თანადამფუძნებელმა, ჩანგპენგ ჟაომ (CZ), მსოფლიოს ქვეყნებს ფიატურ ვალუტაზე მიბმული საკუთარი სტეიბლკოინების გამოშვებისა და საფონდო ბირჟების ბლოკჩეინზე გადატანისკენ მოუწოდა.
ჟაოს თქმით, ტოკენიზაციას, რომელიც ტრადიციულ აქტივებს ბლოკჩეინზე ციფრულ ტოკენებად აქცევს, საფონდო ბაზრების დემოკრატიზაციისა და მათი ინვესტორებისთვის უფრო ხელმისაწვდომად გარდაქმნის პოტენციალი აქვს. ბიზნესმენი აღნიშნავს, რომ ტრადიციული აქციებისგან განსხვავებით, ტოკენიზებული აქციების უპირატესობას, მათი 24 საათიანი ხელმისაწვდომობა წარმოადგენს.
ტოკენიზირებული აქციებით ანგარიშსწორება გაცილებით სწრაფია, მაშინ, როცა ტრადიციული აქციებით ანგარიშსწორებას შესაძლოა რამდენიმე დღე დასჭირდეს. გარდა ამისა, ტოკენიზაცია წილადური საკუთრების შესაძლებლობას იძლევა, რაც ინვესტორებს ძვირადღირებული აქციების მთლიანი ერთეულების ნაცვლად, მცირე წილების შეძენის საშუალებას აძლევს. მილიარდერი მიიჩნევს, რომ თუ ქვეყნები თავიანთი აქციების ტოკენიზაციას მასობრივად მოახდენენ, ისინი მყიდველებს მთელი მსოფლიოდან მოიზიდავენ.
პლატფორმა RWA.xyz-ის მონაცემების თანახმად, წლის შუა პერიოდისთვის საჯარო ბლოკჩეინებში ტოკენიზებული რეალური აქტივების მოცულობა 32 მილიარდ დოლარს შეადგენს. შედარებისთვის, ერთი წლის წინ ეს მაჩვენებელი 6 მილიარდ დოლარს შეადგენდა.
ამერიკული ბანკ Citi-ს პროგნოზით, ტოკენიზებული რეალური აქტივების (RWA) გლობალური ბაზარი 2030 წლისთვის 5.5 ტრილიონ დოლარამდე, ხოლო საუკეთესო შემთხვევაში – 8.2 ტრილიონ დოლარამდე გაიზრდება.
ჟაო განმარტავს, რომ სახელმწიფო ვალუტებით მხარდაჭერილი სტაბილური კრიპტოვალუტები საჭიროა იმისათვის, რომ ადამიანებმა ადგილობრივი ვალუტები ბლოკჩეინებსა და ციფრული გადახდის პლატფორმებზე უფრო ხშირად გამოიყენონ. DefiLlama-ს თანახმად, აშშ დოლარზე მიბმული ტოკენები გლობალური სტაბილური კრიპტოვალუტების ბაზრის თითქმის 99%-ს შეადგენს, რომლის მოცულობა ამჟამად 315 მილიარდი დოლარია. უმსხვილეს სტეიბლკოინებს Circle-ის USDC და Tether-ის USDT წარმოადგენენ, ამ უკანასკნელის დომინირება კი 59.13%-ია.
ჟაო მიიჩნევს, რომ 2031 წლისთვის კრიპტოვალუტები და ბლოკჩეინი შესაძლოა თანამედროვე გადახდების განუყოფელი ნაწილი გახდეს. ის დარწმუნებულია, რომ ქვეყნები, რომლებიც კრიპტოვალუტებს, ბლოკჩეინსა და ხელოვნურ ინტელექტს უგულებელყოფენ, რისკავენ ტექნოლოგიურ სექტორში კონკურენტუნარიანობის დაკარგვის საფრთხის ქვეშ აღმოჩნდნენ.
წყარო: https://x.com/cz_binance/status/2067344333582557267
სიახლეების გამოწერა
