DeFi ინდუსტრიის ზრდა ნელდება

DeFi ინდუსტრიის ზრდა ნელდება

კომპანია Morgan Stanley-ის ანალიტიკოსებმა გამოაქვეყნეს მოხსენება, რომელის მიხედვით  უახლოეს წლებში DeFi-ის ზრდა არ არის მოსალოდნელი.

ამერიკული ფინანსური კონგლომერატის სპეციალისტების განცხადებით, ისინი ჯერ ვერ ხედავენ მტკიცებულებებს, რომ DeFi პროტოკოლები ტრადიციულ ფინანსურ სისტემებზე ეფექტურია.

როგორც Morgan Stanley-ის ანალიტიკოსები ამბობენ, ამ დროისთვის DeFi მხოლოდ პროტოკოლის ოპერატორებს ემსახურება და მოგება მათთვის და არა მომხმარებლებისთვის მოაქვს.

გარდა ამისა, რადგან ანონიმურობა მის მთავარ მახასიათებელს წარმოადგენს, დეცენტრალიზებული ფინანსები სისტემაზე ჰაკერების თავდასხმებსა და სხვა ფინანსური დანაშაულების განხორციელებას განიცდის – ნათქვამია მოხსენებაში.

კომპანიის ანალიტიკოსები მიიჩნევენ, რომ მომხმარებლების შესახებ შეზღუდული ინფორმაცია (KYC) და ფულის გათეთრების საწინააღმდეგო მკაფიო რეგულაციების (AML) არარსებობა მომავალში ინსტიტუციურ მიმღებლობას მნიშვნელოვნად შეანელებს.

მეორეს მხრივ, თუ AML და KYC მოთხოვნები დაინერგა, ეს დეცენტრალიზაციას დააზარალებს და ინდუსტრია მომხმარებლების თვალში ერთ-ერთ მთავარ უპირატესობას დაკარგავს.

„სესხების ზედმეტად უზრუნველყოფა იმაზე მიუთითებს, რომ DeFi კრედიტირება ფულის მასას არ ზრდის.

ანუ, ცენტრალიზაციის გარეშე მომხმარებლები  დეცენტრალიზებულ ფინანსებს, როგორც არსებული საბანკო სისტემის ალტერნატივას არ განიხილავენ.“ – ნათქვამია ანგარიშში. 

Morgan Stanley-ს დასკვნის მიხედვით, უახლოეს წლებში DeFi შედარებით მცირე მასშტაბის ინდუსტრიად დარჩება.

მანამდე, ბლოკჩეინ კომპანია Injective Labs-ის თანადამფუძნებელმა, ერიკ ჩენმა (Eric Chen) განაცხადა,  რომ მომხმარებელთა დიდ ნაკადთან მუშაობის დაწყებამდე დეცენტრალიზებული ფინანსების ინდუსტრიამ უნდა გადაჭრას ისეთი ძირეული პრობლემები, როგორიცაა ტრანზაქციების მაღალი საკომისიო, ლიკვიდურობა და მასშტაბირება.