FTX-ის კოლაფსი ინდუსტრიის გაჯანსაღებას შეუწყობს ხელს
საინვესტიციო ბანკ JPMorgan-ის ექსპერტების აზრით, ბირჟა FTX -ის გაკოტრებით გამოწვეული მიმდინარე საბაზრო სცენარი კრიპტოვალუტის ინდუსტრიაზე საბოლოოდ დადებითად აისახება.
ბოლო დროს კრიპტო სექტორში განვითარებულმა მოვლენებმა ბაზრის მაღალი ვოლატილობა კიდევ ერთხელ აჩვენა.
მიუხედავად იმისა, რომ მთელს მსოფლიოში ბევრი ინვესტორი პანიკაშია, JPMorgan მიმდინარე მოვლენებს სხვა კუთხით ხედავს და მათ როგორც ინდუსტრიისთვის დადებით კატალიზატორს განიხილავს.
ბანკის ექსპერტების განცხადებით, FTX-ის კრიზისი ინდუსტრიას სარგებელს მოუტანს და მას რამდენიმე ნაბიჯით წინ წაწევს.
ერთ-ერთი წინგადადგმული ნაბიჯი, მარეგულირებლების მიერ სექტორის ეფექტური კონტროლისთვის კანონმდებლობის ფორმირების დაჩქარება იქნება.
ყოვლისმომცველი მარეგულირებელი ჩარჩოს დანერგვა კი თავის მხრივ კრიპტოვალუტების ინსტიტუციურ მიღებას შეუწყობს ხელს.
JPMorgan-ის ანალიტიკოსების აზრით, ინდუსტრიის არასრულყოფილმა რეგულირებამ გამოიწვია ის, რომ უმეტეს შემთხვევაში კრიპტოვალუტის პროექტების კრახი ცენტრალიზებულ კომპანიებთან და არა დეცენტრალიზებულ ინსტიტუტებთან ასოცირდება.
ეს აძლიერებს დეცენტრალიზებული ფინანსების (DeFi) სექტორის შესახებ გაბატონებულ შეხედულებას, რომ ის უფრო მდგრადია.
JPMorgan-ის ანალიტიკოსების პროგნოზით, კრიპტოვალუტების ვარდნა არ დასრულებულა და FTX-ის კრიზისმა შესაძლოა „კასკადური ლიკვიდაციები“ გამოიწვიოს. JPMorgan-ის მოსაზრებას კრიპტო სექტორის არაერთმა ექსპერტმა დაუჭირა მხარი.
ისინი შექმნილ სიტუაციას 2008 წლის ფინანსურ კრიზისს ადარებენ და მიაჩნიათ, რომ ბაზრის ვარდნა გარკვეული დროით გაგრძელდება.
თუმცა, JPMorgan-ის გუნდი თვლის, რომ კრიპტო ბაზრის მთლიან კაპიტალიზაციაზე დარტყმა, სავარაუდოდ, ამჯერად უფრო უმნიშვნელო იქნება, რადგან TerraUSD-ის ეპიზოდმა რისკების დაქვეითება უკვე გამოიწვია და საეჭვო პროექტებში ინვესტიციების მიმართ უფრო ფრთხილი დამოკიდებულება ჩამოაყალიბა.
- გამოგვეყვით ტელეგრამზე t.me/cryptonewsgeorgia
- დაემატეთ ჩვენს ჯგუფში Fb.me/groups/cryptonewsgeorgia
Comments (No)